لوحة شعرية تميزت بروعة التصوير وقوة التعبير رسمها شعرا وجسدها 
مشاعرا وطوع مفرداتها بتمكن وتميز الزميل الشاعر القدير سعد بن زمانان – معد ومقدم برنامج ديوانية الشعراء بتلفزيون الكويت- وأهداها -مشكورا- بمناسبة إلى أعضاء (نخبة الشموخ :
سر ياقلم وإكتب بيوتٍ لها روح
إكتب بيوتٍ بالمعاني جزايل
عبِّر عن المكنون في منهج البوح
والشاعر يترجم شعوره مثايل
على النقا على الوفا يبعد الشوح
وياخذ من علوم الليالي دلايل
أحدٍ يعيش بدنيته دوم ممدوح
وأحدٍ يعيش ولا ظهر له فعايل
واللي يحب الحق يمشيه بوضوح
على العدل ومجنبٍ كل مايل
وإليا إعتذر له صاحبه قال مسموح
نال الأجر منها وقدر وجمايل
يتعب على الطولات ويعزز صروح
صروحٍ تخلد له مع الناس فايل
ويقوِّي عزومه على عالي الصوح
حاز السمينه ماقرب للهزايل
وأحدٍ على رزقه عجولٍ ومشفوح
وأحدٍ قنوعٍ لو نصيبه قلايل
واللي يخلط الجِد في هرجة مزوح
تفتح عليه أبواب من كل عايل
واللي بلا معناه يأتيك ويروح
لاجايبٍ خيرٍ ولامن صمايل
لا تقترب منّه ولاّ مِنْه مصلوح
ميّز مابين عدودها والثمايل
والرزق بابه ياهل العرف مفتوح
عند الذي ينشي صدوق المخايل
والرزق هو والأجل محفوظ باللوح
واللي كتبه الله مابه بدايل
*سعد بن زمانان*
