جبروت امراه / الجزء الأول

وقبل ما نبدأ حكايتنا اعرفكم على بطلتنا اسمها نوال عندها 27 سنه متجوزة وعايشة في بيت عيله
وفي يوم الحما كانت قاعده مع جوزها وبتقولو اسمع يا مصطفى انت لازم تكتب كل حاجة باسم علي

مصطفى
اكتب كل حاجة باسم علي ازاى بس يا سعاد انتي عارفه انتي بتقولي ايه ده كده ممكن عيالك ياكلو في بعض لا طبعا مش هعمل كده عشان مش عايز العيال ياسعاد

سعاد
ومين بس اللي قالك انك هتظلمهم ده انت كده هتحافظ على مالك ياخويا بدال ما يحيى ياخد نصيبة ويضيعة على ما تتسمى مراتة وهي لا بتعرف تحافظ على قرش ولا على حاجه

مصطفى
هو انتي عايزه ولادك يورثوني بالحيا ياسعاد قفلي بقا على الموضوع ده واسكتي

سعاد
ياخويا بعد الشر عليك والله انا مقصد حاجة يامصطفى ربنا يطولنا في عمرك يارب انا بس بقول انك لما تعمل كده ده عشان مصلحتهم وعلي انت عارفه دماغه كبيرة وواعي وبيعرف يحافظ على مالك انما يحيى دماغه مش فيه وكلمة بتوديه وكلمة بتجيبة والسخامة نوال ممكن تقوله هات الفلوس نعمل مشروع وتاخده في السكة دي وتخسرة كل حاجة زي ماحصل قبل كده

مصطفى
طيب ماهو يحيى كده هيزعل لما يعرف ان على بقت كل حاجة باسمة

سعاد
مش هيزعل ولا حاجة لا طبعا يعني بعد عمرا طويل على هيدي لاخوه حقه ومش هياكل عليه حاجة وانا اتفقت معاه على كده

مصطفى
خلاص سبيني افكر كده مع نفسي واشوف انا هعمل ايه

وفي شقة نوال قالت لجوزها يحيى
بقولك يا يحيى وانا تحت عند امك اسمعتها هي وابوك عاملين يرغو مع بعض بصوت واطي مش عارفه هما كانو عمالين بيرغو في ايه لا وامك كانت موطيه صوتها على الآخر وانا بنضف جوه المطبخ  ومعرفتش اسمع برضو هي قالت له ايه ولا كانت بتتفق معاه على ايه حكم انا عارفه امك دي محراب شر

يحيى
بقا انا اني امي محراب شر يانوال طب قفلي بقا على الموضوع ده وخلي يومك بعدي

نوال
يوه هو انا قولت ايه يعنى يا يحيى وبعدين ماهو المفروض نعرف اي حاجة بتحصل في البيت ده

يحيى
واحنا مالنا احنا يانوال ابويا وامي يتكلموا بصوت واطي يتكلموا بصوت عالي هما احرار مع بعض انتي شاغله بالك بيهم ليه

نوال
مالنا ازاى يا راجل لا ياحبيبي ده مالنا ومالنا كمان هو احنا مش عايشين في البيت ده معاهم ولا ايه وبعدين ده علطول واخدين اخوك علي تحت جناحهم بس هو راجل وليه كلمتة مش زيك

يحيى
زي يعني ايه وانا مالي بقا يانوال مش مالي عينك انا ولا ايه

نوال
لا ياحبيبي مقصدش حاجة والله انا بس بقصد انهم بياخدو رأي  علي في كل كبيرة وصغيرة انما انت اللي بتاخد رايهم في اي حاجة وبعدين انا قولتلك كذا مره تكلم ابوك وعلى انهم يخلوك تمسك المصنع الجديد وتبقى المدير العام

يحيى
طيب مانا مرتاح في المصنع القديم وانا برضو المدير انما الجديد ده علي اخويا اللي عمله

يحيى
وانت برضو بيخيل عليك الكلام ده ابوك هو اللي عاملة المصنع ده يعني المال مال ابوك وانت متقدرش تقولهم يعملولك حاجة زيه كده

يحيى
عشان هما امي وابويا انا مقدرش اقولهم على اي حاجة وبعدين انتي ملكيش دعوة باللي بيدور في البيت هنا امي وابويا واخويا احرار في اي حاجة بيعملوها انا قولت لك اهو واوعي بقا كده خليني انزل اقعد مع امي تحت واشرب معاها الشاي

ويحيي سابها ونزل عند امه وقالتلة
ايه يا يحيى مالك انت في حاجة مضايقاك ياحبيبي

يحيى
لا يا أمي أنا كويس الحمد لله بس كنت عايزك تقولي لعلي يخليني ادخل معاه شريك في مصنعه الجديد او يعيني مدير عنده

الام
ليه ياحبيبي ما انت مدير عند ابوك في مصنعه  يا يحيى  وبتاخد مرتب حلو اوي الحمد لله عايز ايه تاني بقا

يحيى
ولا حاجة ياما ده كان اقتراح مش اكتر طيب انا ماشي مش مني عايزة حاجة

الام
رايح فين  يا يحيى خليك ابوك زمانة جاي واتعشا معاه

يحيى
لا يا أمي أنا اتعشيت ورايح اقعد في الكافيه مع واحد صاحبي

وعند على في شقتة كان قاعد بيخلص ورق خاص بالشغل مراته رحاب قالت له
انت هتفضل قاعد على الورق ده طول الليل ياعلي مش هينفع كده ياحبيبي انت لازم تقوم تنام ساعتين ولا حاجة قبل ماتروح شغلك

علي
اعمل ايه بس يارحاب لازم اخلص كل الورق بتاع المناقصات ده ولازم الصبح يكون موجود في المصنع عشان اسلمة لابويا متظبط بكل حاجة

رحاب
طيب ماتخلي يحيى يساعدك فيه هو برضو مش المفروض انه مدير في المصنع ومسؤول عن الأوراق دي

علي
والنبي تسكتي يارحاب يحيى ايه بس وبتاع ايه هو يحيى اخويا ده بيفهم في اي حاجة ده انا ابويا مقعده في المصنع بس عشان خاطر يديلة فلوس والاسم انها مرتب انما هو اصلا ولا ليه اي تلاتين لازمة في المصنع هو بس كل اللي عليه انه يتكلم وياخد فلوس وخلاص

رحاب
الله طيب ولما هو كده متنقلوه في اي مكان إداري تاني لحسن يعمل حاجة يبوظ الدنيا ياعلي وتيجي على دماغك انت في الاخر

علي
لا متقلقيش يارحاب انا صاحي ليه اوي وعارف كويس هو بيعمل ايه

وتاني يوم في المصنع علي كان بيزعق لموظف وبيقوله
انت ازاى تاخد الطلبية دي تسلمها من غير ماترجع لي يا حامد هو انا مش المفروض امضي عليها ولا انت ايه خلاص ماشي بدماغك ومش ليك كبير هنا ولا ايه

حامد.
العفو يا استاذ يحيى بس والله الحاج مصطفى والأستاذ  علي  هما اللي قالولي اني اروح اسلم الطلبية دي من غير مارجع لحضرتك

يحيى
ااه طيب روح انت وانا ليا كلام مع علي والحاج يلا امشي انت دلوقتي من قدامي

ويحيي قال لنفسه يعنى انا مليش اي لازمة هنا في المصنع ده لما اروح اشوف اللي حصل ودخل يحيى عند ابوه وقال
ينفع كده ياحاج اتفاجأ ان حامد يروح يسلم الطلبيه الي  المفروض ما اوقع  عليها  ويقولي الحاج هو الي امر بكده هو والأستاذ علي

مصطفى
وفيها ايه يا يحيى ماهو اخوك علي برضو بيمضي على اي حاجة وانت وهو واحد ايه المشكله يابني مش فاهم وبعدين انا الي قولت له يخلص الطلبيه ما احنا مش كل يوم هنعطل الشغل لحد ما تيجي  يا يحيى انت بتيجي المصنع متأخر

يحيى
خلاص يابابا اللي تشوفه طالما حضرتك الي  أمرت يبقى الي  تشوفه عن اذنك انا ماشي

ومشي يحيى ودخل علي لابوه وقاله :
هو ماله يحيى ياحاج بكلمة واخد في وشه وماشي ومش بيرد عليا هو في حاجة حصلت

مصطفى
لا يا علي ده هو زعلان بس عشان محطش امضته على الطلبية اللي اتسلمت النهاردة

علي
طيب ماهو اللي بيجي متأخر واحنا مش هينفع نعطل الشغل لحد مايجي

مصطفى
سيبك منه ياعلي وخلينا هنا دلوقتي انا عايزك تكلملي المحامي عشان عايزة في موضوع مهم كده بخصوص املاكي

على
هي امي قالت لك برضو على الي  في دماغها أصلها قالت لي وانا بصراحة رافض الموضوع ده

مصطفى
ورافض ليه ياعلي ايوه هي قالت لي وبصراحة لما فكرت فيها يا علي لقيت ان كلام امك صح وانا لازم اعمل كده عشان انت اللي هتحافظ على مالي من بعدي بس طبعا مش هوصيك على اخوك ياعلي

على
انت بتقول ايه يابابا ده مهما ان كان يحيى اخويا وانا عمري ماكل حقه

مصطفى
مانا عارف ياعلي عشان كده يابني عملت الي عملته ده بعد تفكير كتير بصراحة بس لقيت انك  قدها وقدود

وعند يحيى  في شقته نوال قالت له
بقولك ايه يا يحيى انا عايزة اروح أزور امي واقعد عندها يومين كده وارجع

يحيى
خلاص استأذني من امي الأول

نوال
هو انا كل ما قولك حاجة ياراجل تقولي خودي رأي امي خودي رأي ابويا هو انت ملكش كلمة في البيت ده خالص يا يحيى

يحيى
بقولك ايه يا نوال انا مش ناقصك بطلي كلامك ده انتي فاهمة ولا لا وبعدين البيت ده بيت ابويا وامي وهما كل حاجة هنا بامرهم وبس
وسابها ودخل الاوضة

نوال
هو ايه ياختي ده كل حاجة قولي لأمي قولي لابويا وانت ملكش اي تلاتين لازمة

ورجع مصطفى البيت وقال لسعاد
انا عملت زي ما قولت  يا سعاد كتبت كل حاجة باسم علي عشان فعلا لقيت ان علي هو الي  هيحافظ على المال انما يحيى ملوش في حاجة خالص

سعاد
ينصر دينك يا مصطفى هو ده الكلام ياخويا ولا بلاش ربنا يخليك لينا يامصطفى بس مش برضو المفروض انك تعرفهم باللي عملته ده

مصطفى
اكيد طبعا هعرفهم انتي بس جميعهم كلهم  علي ومراتة ويحيى  ومراتة عشان اعرفهم بالي انا عملته عشان كل واحد يبقى على نور كده من اولها

سعاد
خلاص يومين كده واخليهم كلهم موجودين ونقولهم ايه رايك

مصطفى
ماشي ياسعاد اللي تشوفيه

وعند نوال قالت ليحيى
بقولك ايه ياحبيبي انا عايزة اجيب حتتين دهب كده في أيدي يحيى  اصل الي عندي بقى قديم وانا بصراحة نفسي اجدده

يحيى
تجددي ايه وقديم ايه يانوال هو الدهب كمان في جديد وقديم بقولك ايه انا خلصت الفلوس اللي معايا

نوال
طيب ماتجيب من ابوك يا يحيى الله مانا شايفه المخفيه مرات اخوك على طول  جايبه ذهب جديد ولبس جديد واشي ايه واشي ايه اشمعنى هي يعني يا يحيى هو انا مليش حق ادلع بفلوس جوزي  وحمايا زيها ولا ايه وبعدين انا احلى منها بكتير اوي يعنى من حقي ادلع اكتر منها

يحيى
يوووه هو انتي مابتصدقي تتفتحي يانوال حرام عليك بقى ارحميني ياست انت ياساتر منك

نوال
خلاص يبقى تعمل الي قلت لك عليه هات لي فلوس خليني اجيب ذهب جديد

يحيي
طيب انا هبقى اخد من ابويا فلوس واجبهالك خلاص بقى يانوال

نوال
لا مش خلاص يا يحيى عشان مش حاجة لازم تعرف ابوك وامك عن حياتنا ماتخلي اي حاجة تحصل بيني وبينك والفلوس اللي انت عايزها تأخدها من المصنع من غير متاخد اذن حد

يحيى
يعني ايه يانوال وهي الفلوس اللي في المصنع دي فلوسي انا لوحدي ماهي فلوس ابويا وانا بقبض زي اي موظف في المصنع

نوال
لا ياحبيبي انا بقى عايزاك تبقى الكل في الكل الفلوس الي  تعوزها تأخدها من غير اذن اي حد خالص

يحيى
والله شكلك مش هتجبيها لبر يانوال انا مش عارف بس اعمل لك ايه اكتر من كده ولا أرضيك ازاى

وتاني يوم يحيى كان في المصنع وقال لمدير الحسابات
انا كنت عايز مفاتيح الخزنة ياحسين

حسين
طيب هو الحاج يعرف يا استاذ يحيى بانك عايز مبلغ من هنا

يحيى
انت اتجننت في عقلك ولا ايه

يتبع ….