مثل السحابة هامتي بين الاجناس
وهبه .. من الخلاق رب البريه
متواضعة بالطيب والطيب نوماس
سيره … تناقلها العرب لعربيه
ساسه ابوي معطره بعطر الانفاس
عليه … رحماتي بصبح وعشيه
رجلٍ ولا بكل الرجاجيل ينقاس
معدن ذهب وزنود فعله قويه
ورثت هيباته وشعره والاحساس
وقليل من بعض الصفات الابيه
واخذت من نوره شبيهٍ للاشماس
دفءٍ حواني بنظرته.. مرحميه
هو مرجعي في كل روحه ومجلاس
ورشاد فكري .. ميسره .. وعسريه
علمني اللي ماخذيته بمدراس
علمٍ .. يوقيّني .. حرور الاسيه
علمني الحشمة وتوقير الالباس
وحفاظ ديني وما توجب عليه
ونقاة خطواتي عن دروب الادناس
ومجانبي لاهل العلوم .. الرديه
حذرني اتعالا تكبر على الناس
وكرر وصاة الخُلق فيني وصيه
قلبه وروحه بالرضا دوم حراس
فيني الهقاوي منه دومٍ جليه
وريثته بالعقل والندّر الماس
اللي .. بشهرتها .. دوامٍ .. غنيه
وانا بوصيات الغلا طيب الساس
متمسكة بالنصح مادمت حيه
ابوي ماخذله مع الطيب مرواس
هذا .. ابويا .. غير مافيه زيه
ياجعل قبره في نعيمات الاوناس
في جنةٍ خضرا وروحه رضيه
كلمات :
غزيل سعد_الملتاعة
