نحب نعيش…
د. جلال الطويهري
نحب نعيش… وفي بلادي مخلونيش كلمة بسيطة أما وراها جبال من الوجيعة نحب نعيش كيما الناس اللي أحلامهم ما تتقصش قبل ما تولد كيما العيون اللي ما تخافش من غدوة وكيما القلوب اللي ما تتعلمش تصبّر روحها أكثر من اللازم.
نحب نعيش…
أما في بلادي ما خلونيش.
كبرنا وإحنا نقولوا غدوة خير وغدوة تعدي وتشد معاها شوية من روحنا تمنينا طرق مفتوحة فرص عادلة وطن يفهمنا قبل ما يحاكمنا يحتوينا قبل ما يجرحنا أما الحقيقة كانت قاسية… قاسية لدرجة خلت الواحد يحس روحو ضيف في بلاده، يترقب، يتنازل، ويتحمل فوق طاقته شنوة ذنب الشباب اللي كي يحلم يقولوله مستحيل شنوة ذنب اللي قلبه معلق بالبلاد أما البلاد معلقة بسقف ما يطيح كان عليه؟ نحب نعيش… كلمة تخرج من الحناجر اللي تعبت، من صدور ضاقت بالضغط والهم ومن عقول عايشة بين الرحيل والبقاء.
ومع هذا…
مازلنا نحبّو بلادنا على خاطر الحب الحقيقي ما ينقطعش ولو بالقهر بلادي وان جارت عليا عزيزة واهلي وان ظلموني كرام مازال في القلب ركن صغير يقول يمكن… يمكن نهار نلقاو بلاصتنا يمكن يجي نهار نعيشوا فيه بلا خوف بلا قيود بلا وجيعة متاع الفرص الضايعة.
نحب نعيش…
مش طلب كبير.
طلب حقي وحق كل انسان وحق كل مواطن تعب من الوقوف على نفس الباب اللي ما يفتحش وحتى لو قالوا ما خلّوكمش…
نرجع نقول يكفينا نحلم… خاطر الأحلام هي آخر حاجة ما ينجم حد ياخذها منا.
د. جلال الطويهري
ناشط حقوقي
