اغرب فندق في العالم

تعرف ان مصر فيها اغرب فندق في العالم و تحديدا في واحة #سيوة ، فندق فريد من نوعه لا فيه كهرباء و لا تليفزيون و لا تليفون ولا تكييف و لا اي تكنولوجيا و يعتبر من اغلي فنادق العالم

فندق ” أدرار أملال ” هذا اسم الفندق باللغة الامازيغية و اللي ترجمتها بالعربية فندق ” الجبل الابيض ” ، الفندق هذا واحد من اغرب فنادق العالم ان لم يكن اغربهم و اللي بيخطفك من حياة الصخب و الضوضاء و التكنولوجيا و يرجع بيك لزمن ما قبل عصر السرعه و التكنولوجيا

في الفندق هذا مفيش حاجة اسمها كهرباء و لا موبايل و لا اي حاجة من عصرنا الحالي ، كل حاجة هناك من الطبيعه و من البيئة الصحراوية يعني الاضاءة كلها من خلال الشموع و الفوانيس و الاكل معتمد علي الخضراوات المزروعه في حديقة الفندق و الطهي معتمد علي الطرق التقلدية اللي كان بيطهو بيها اهل الصحراء زمان

الفندق عبارة عن فندق ملحي ( مبني بالحجر الملحي )

مكون من ٤٠ غرفة مبني وسط الصحراء علي اطراف واحة #سيوة و تم بناء جدرانه بالكامل من الرمال و التربه السيوية و اللي بنطلق عليها اسم ” إيريغ ” وهذه عبارة عن ملح مغلف بالطين و تعتبر مادة بناء عازلة للحرارة زي الطوب اللبن كده و كانت بتستخدم في البناء في سيوة من الاف السنين وهذا بيخلي #أدرار_أملال كأنه واحة باردة وسط سخونة الصحراء الحارقة

ابواب الفندق خشبيه و سقف الغرف مصنوع من اشجار النخيل و الاثاث كله بدائي من الطبيعه و بتحيطه واحده من أكبر سبعه بحيرات سيوة كمان مع وجود اشجار الزيتون و النخيل في تناغم يحسسك انك دخلت في فجوة زمنية رجعتك لورا الاف السنين

سياح كتير بتيجي مخصوص عشان تنزل في الفندق هذا عشان تعيش التجربة و اشهر اللي زارو الفندق واقام فيه هو الملك تشارلز ملك انجلترا و زوجته

علي فكرة الفندق غالي جدا و فكرته اغلي ووجوده علي ارض #مصر و علي ارض #سيوة الجميلة #واحة_الغروب اغلي و اغلي

مصر فيها كل انواع السياحه اللي ممكن تتخيلها سواء سياحه تاريخية او شاطئية او كلاسيكية او دينية لكن الغريب هنا اننا كمان اكتشفنا فيها سياحه جديدة اسمها سياحه الرجوع بالزمن