شعر وشعراء
الشهيد قاسم محمد الشايب. برقين. 1910. 9/1/1938. على ارض بلعا. اشتباك مع قوات بريطاني/ شعر دلال عتيق
الشهيد قاسم محمد الشايب. برقين. 1910. 9/1/1938. على ارض بلعا. اشتباك مع قوات بريطانية
……………………………………
يوم جابوا قاسم
مضرج بدمه
قالوا
خبوا عن اخته الأخبار
وستي تقول
يا قلبي على قاسم
يشعل نار
من مدة انقطعت أخباره
ما عدت أدري
شو صار
ربي يحميك
انت والثوار
وتسأل :
مين الشهيد الي جابوا ؟؟؟
قالوا :
ما حدا عرفه !!
ربي يصبر أهله
غريب ديار !!
قالت ستي
يا خوفي الشهيد يكون قاسم
جوا عيونكم
في اسرار
—————————————-
وستي ما يئست
ظلت تسأل
ويوم راحت تنظف له الدار
وتقول :
خي غريب ديار
باكر يجي من حيفا
وحداني يا خي
لا ام تضمه
ولا مره تشاركه المشوار
ولا صبي يحمل اسمه
ولا مين يُردله طاسة على نار
بس تلفي يا خي
لخطبلك أحلى صبية
من خيرة الأخيار
وبايدي ازين عباتك
وافرش دربك
بالزهر والنوار
وع الفرس زفتك تمر بكل الشوارع
تاتوقف بساح البلد
على الدوار
—————————–
وستي بدندن
وبترش الساحة بالمي
وبتنظفها من الحجار
يا قاسم يا عصابة راسي
بعد ما راحوا الغوالي
وحدك اهلي وناسي
وانت سند ظهري
وعزوتي يا خوي
يحميك يا كحل عيني
يا تاج على راسي
—————————
شافتهاحجه بالحوش
ضربت كف بكف
وقالت :
سلامة عقلك يا بنتي
في ميت برجع عالدار ؟!
ستي……
مسكت بالحجه
بغير وعي منها تحلفها
بالنبي والحِجه
عادت الحجة كلمتها
وستي عيونهاجاحظة
بعدها بغفلتها
وبلحظة ……..
مثل الي لفها
اعصار
والمكنسة الي بايدها
طير علا بالسما
وطار
فزعت تصرخ ع أهل الدار
————————
قالوا ،،،،،،،
قاسم مع الأبرار
صرخت ستي وقالت
وين ترابه ؟؟
بأي دار ؟؟
قالوا ،،،،،
في عرابه ،،
اجتنا الأخبار
من الفجر
ستي شدت على الحمار
قالوا لها
خذي معك الصغار
واذا حد سألك
قولي جاي اباركهم
وصفولي هون في مزار
واذا عيونك غصت بالدمع
قولي دخل غبار
بكفي الموت
يكون موت
وخراب ديار
———————-
أبشرك يا ستي
وانت تحت التراب
بلي صار
سمعت مرة تقرير
قالوا فيه
قاسم الشايب من الثوار
ترابه بركه
وقبره في عرابه مزار
دلال عتيق
