بسمة عيونك ميجنا .. واوف وزجل
والمشيه لما بتخطري خطوة حجل
لما بشوف البسمة عخدودك انا
بيخطر عبالي الشعر .. ودروب الغزل
قومي مع الغيمات طلي عالقدس
مهرة اصيلة مأصلة .. انتي الفرس
وان طالت الغربة وطول ليلها
لاعبر صحاري الموت .. ماخاف الحرس
قومي اسبقي هالشمس طلي عالمدى
ياللي جمالك سر ما عرفو .. حدا
قومي مع الحنون غني للصباح
رشي على النوار في السهل الندى
طلي على قلبي ولو حتى منام
بعدك ظلم .. والظلم في حبك حرام
طلي وخلي هالمدى ساحة فرح
طلي لتضوي هالشمس وسط الظلام
ثوبك اغاني معتقه وناي ودفا
وكروم عز ملونة .. وبهجة وصفا
جيتك تعالي عالوعد نرسم صبح
والوعد دين .. وطبع الاحرار الوفا
صوتك اغاني زهور في وسط نيسان
وبسمة طفل غافي .. بيحلم وفرحان
صوتك بيشعل في القلب شمعة فرح
ما بتنطفي .. ابدا ما بتعرف النسيان
بلمح بعتم الليل دمعة شاردة
من طرف عينك مثل غيمة واردة
غيمة عطر تمطر على قلبي جمر
تشعل حنيني في الليالي الباردة
لو تضحكي .. النوار بطلع والزهر
والصحرا جنة والرمل يصبح نهر
ولو تزعلي بيطفي القمر وسط السما
بتغرب شمسنا .. بيغرق بموجو البحر
لونك شموخ الكرمل ونبض الجليل
اسوار عكا مسيجه وعنب الخليل
لونك بهاء القدس في وقت الغروب
ساحات عز مزينة بصوت الصهيل
صوتك دعاء الام في نبرة حنين
انتي الامل والروح .. والحبل المتين
امي .. وبنتي .. ورايتي طول الزمان
انتي الحبيبة. . والوطن .. انتي فلسطين
كلمات : منذر ابو حلتم
اللوحة للفنان : نبيل عناني
#فلسطين #القدس #الشيخ_موّنس #يلادنا #بلادنا #بلادي #تراث
