نحن اربع شباب وكل يوم خميس منخلص شغلنا. و نجتمع ونسهر انا واخواتي عند بيت اهلي
بالبداية كنا نجي نحن ونسواننا وأولادنا الصغار
وكانت أمي تعمل غداء للكل ومنقعد ناكل وننبسط ونسهر وبعدين كل واحد بيرجع لبيتو
بس بعد ماكبرو الأولاد صرنا نجتمع انا واخواتي الشباب بس… وكانت أمي كل خميس تعملنا صينية حلو.
نسهر للصبح ونحن عم نضحك ونمزح وتحكي شو صاير معنا وكانت أمي تقعد وهي ماسكة المسبحة وابتسامتها ماتفارق وجهها وهي عم تسمع لقصصنا وحكاياتنا ويا إلهي شو كانت تضحك على نكات أخي خالد
الحمدلله انا واخوتي متفقين ومنحب بعض والعالم كلها يحسدنا على هل الشي بزمن الاخوان فيه صايرين متل الاعداء
حتى بعد وفاة الوالد ماقطعنا ولا خميس عند امي
وفي يوم خميس رحت عند امي فاستغربت انو اخواني مو موجودين فلما سالت امي قالت انو
اخي الكبير مرضان وأخي خالد عندو سفرة على الشام وجمال عندو شغل ضروري
فانا اكلت هم شو بدي احكي مع امي لانو هي كلامها قليل ومابعرف باي موضوع بدي افتحو معها فمنشان ماتاخد على خاطرها قلت بقعد معها شوي
انا؛ كيفك امي شو اخبارك طمنيني عن صحتك؟
فقالت : اليوم رحت عند الدكتور
انا: ليش شبك امي ؟؟
امي : والله يا ابني انا صارلي فترة ماعم نام من وجع المفاصل
انا استغربت كتير لانو أول مرة بعرف انو أمي معها وجع مفاصل والغريبة انو كل خميس كنا نجتمع عندها ولامرة حكيت انو موجوعة .. أو بالأحرى يمكن ولامرة سالناها شو عم يوجعها
انا : امي ليش ماقلتي انك موجوعة منشان نحن ناخدك على الدكتور
امي : انتو جايين تنبسطوا مابدي اياكم تاكلو همي وهلق إذا عرفوا اخواتك اني موجوعة بيجوز يبطلوا يجو كل خميس ويسهروا منشان مايضايقوني
وبعدين اطلعت فيني وقالت: شبك حاسستك مهموم؟
فقلتلها : أحوال المحل داقرة شوي ورغم انو بضاعتي أحسن وأرخص من بضاعة جاري
بس المشكلة الناس عم تشتري من عندو وماعم تشتري من عندي
فاطلعت فيني قالتلي: اي صحيح انت كان بدك زيت حلو ليك فيه واحد قرايب جيراننا عم يبيع التنكة ارخص من السوق بكتير اذا بدك لوصيلك على وحدة
انا :ليش عم يبيع ارخص من السوق مايكون من هديك السنة أو مؤكسد؟؟ ببجوز مغشوش لاء مابدي
امي: عرفت ليش الناس ماعم تشتري من عندك….
يتبع
مواقف
بلان نيوز التوصل الاجتماعي
