ياابني الناس بتخاف من الرخيص .. أنا قايمة اعملك فنجان قهوة
اطلعت فيها وانا مستغرب.. قديش الي بالسوق وقديش اجتمعت مع أخواتي وعالم كتير بس ماحدا قلي هل الكلام العميق هيك واعطاني الحل لمشكلتي بدقيقتين
المهم امي أخيرا غلتلي القهوة شربتها وانا حاسس انو عم اشرب اغلى ترياق بالعالم لانو صدقا ولاحدا بالعالم بيعرف يساوي فنجان قهوة متل مابتعملو امي
مريت الايام ونحن كل خميس منجتمع انا واخواتي الشباب.. نحن منحكي وأمي بس بتسمع وهي ماسكة مسبحتها عم اتسبح مرة لطيفية ومرة تانية الفاتحة وكل مرة بتعملها لواحد مننا على نية الرزق والصحة
وابتسامتها مابتفارقها واخر السهرة كانت امي تدخل علينا وهي جايبة صينية القهوة بايديها يلي عم ترجف يلي كان بالنسبة النا اطيب فنجان بالعالم
امي اتوفت بعد فترة بس اتفقت انا واخواتي انو بيت العيلة راح يضل مفتوح وكل خميس لازم نجتمع مع بعض
اجا أول خميس بعد وفاتها اجتمعت مع أخواتي بس فجأة ساد الصمت ولاحدا مننا فتح تمو بكلمة وكل واحد فتح موبايلو وصار يتفرج عليه وبعد شوي كل واحد راح على بيتو
تاني خميس الكل اعتذر عن الاجتماع وكل واحد كان عندو حجية شكل
والخميس يلي بعدو ماعاد حدا سأل
وبالاخر اتفقنا نبيع البيت
اكتشفت انو نحن كنا عم نروح منشان نحكي شو صاير معنا حكاياتنا وهمومنا وفرحنا لأمي مومنشان نشوف بعض
عم نروح لنشوف ابتسامة امي يلي كانت اتنسينا كل هموم الدنيا
عم نروح لنشوفها وهي ماسكة مسبحتها ونسمع صوتها ونرتاح وهي عم تذكر رب العالمين وتدعيلنا
عم نروح منشان نشرب من ايديها احلى واغلى فنجان قهوة بالعالم
