عام لي خذيت الباك، قلي الوالد الله يرحمه ويسكنه فسيح جنانه شوفي بنتي المستقبل في افريقيا ويلزمك تفكري بجدية في الموضوع. قلي الوالد فكري بنتي في افريقيا وأي مشروع ما ينجم يكون كان ناجح خاطرها بلدان ستبدأ الإعمار في جميع مجالاته. قلي الوالد بعد 10 وإلا 15 عام ما يبقى حتى بطال في تونس اذا بلادنا تعرف كيفاش تتعامل مع افريقيا كمعطى جديد وتستثمر في أدوارها السابقة وتسترجع مكانتها.. لحقيقة ثما حاجات وقتها فهمتها وثما حاجات ما فهمتهاش وثما حاجات ضحكت عليهم وقلت بابا كان موش يخدم أستاذ راني قلت خاطرو بطال من اليأس يخمم يخدم في دولة افريقية.. اما الحق آمنت بفكرته وتناقشنا برشا مرات حتى فهمت الحيثيات وأسباب دفاعه على فكرته خاطرني ناثق في كل حاجة قالهالي و في مخي بابا يفهم برشا وشكون يفهم اكثر من أستاذ الفلسفة في السياسة والاقتصاد والاجتماع والنفس والوعي واللاوعي..
كبرت انا وتوفى بابا الله يرحمه. وبقيت ديما نحب فكرة بابا لدرجة اني اكثر حاجة حبيتها في الاذاعة انه يكون عندي برنامج على افريقيا.. نتذكر اول مقال صحفي عملته في 2015 على الخطوط الجوية الاثيوبية. كانت صدمة معرفية حقيقية. وإهتميت بالسنيغال والكوت ديفوار ورواندا وافريقيا الجنوبية. انبهرت برشا بالدول الافريقية ولحد الساعة إذا نلقى فرصة العمل في دولة افريقية مستحيل نتردد. نكون محظوظة.
ما فهمتش شبيه العالم الكل فايق باللعبة ويحارب من أجل التموقع في إفريقيا إلا احنا التوانسة. قداش عندنا من عُقد وقداش غالطين في ارواحنا وفاهميين بالغالط. وابداها من الجهل متاعنا وقت نحكيو ونقولو الأفارقة ناسيين لي أحنا قلب افريقيا.
موش عارفة وقتاش المسؤولين يفيقو. وقتاش ترسم تونس استراتيجيات تنموية ومخططاتها بالنظر للعمق الإفريقي. دول هاربة بنا نسبة النمو فيها من 8 الى 13 •/• وأحنا موش هنا فارحين بهمنا ونسبنا الطايحة بين 0.8 •/• و 1.3 •/•
وقتاش يبدا عندنا برامج اعلامية خاصة بالشأن الإفريقي وتساهم في التنمية الحقيقة. وقتاش ووقتاش ووقتاش
الوقت هو الوقت اما احنا ما عندنا قيمة لشي. كان جات تونس في موقعها دولة أوروبية وإلا ولاية أمريكية وإلا صينية وإلا روسية وإلا تركية رانا شفنا تونس أخرى. رانا شفنا تونس محرار وبوصلة العالم ورانا شفنا تونس تضمن في دول أخرى موش تضمن فيها الشقيقة الجزائر بوديعة قادرين رجال أعمال توانسة يوفروها. عندهم الحق رجال الأعمال ما يعملوش عملة كيف هذي من أجل دولة الفساد. كان جات تونس دولة شعب مثقف ومتعلم ووو رانا موش هكا. كذبة كذبوها عليكم وصدقتوها. انا ما ريت كان الجهل والعودة إلى الوراء. ريت كان ناس شادة في الماضي البائس لي ولّى زمانه. ناس طايرة بآخر صيحات التكنولوجيا وفي صراع دائم من أجل التطوير والتحديث وأحنا خايفين من المستقبل ورهاناته وراجعين للماضي. ممكن شعور بالأمان ولكن المغامرة ضرورة من ضرورات التغيير.
ونرجعو لواقع مسؤولينا في علاقة بأفريقيا ما تلقى كان عدد من المستثمرين زار دول افريقية ورجع لتونس منبهر وتُوفى لحكاية غادي. ما تلقى كان رئيس جمهورية وإلا حكومة يثمن في حكايات هو اول واحد يعمل عراقيل باش ما تتقدمش.
الله يرحمك يا بابا رحمة واسعه وأنا نوعدك إذا لقيت هجة لأفريقيا ما نفلتهاش.
التصويرة هذي حيرت مواجع. ان شاء الله قيس سعيد موش كيف لي سبقوه. شكون يعرف
