( الخردلة منه كنهر)
مطلوب صديق
يقدر يعِد لما ييجي الليل
نجومه
يسعي ف موجة البرد
لنار الدفا
نظرة عنيه
تشبه محيط مالوش قرار
تحتار
تقيد له شمعةمن روحك
يشوف بوحك
يخطي الدمعة بصعوبة
وحرقة الآهة العفيِّة
يعشق تراب الشوقة
ف صدر الندي
عمره ما يخاف الأمل
أو ضحكة الحزن السبيل
سامع هديل
بيرُخ من عشم القمر
ف ليل أخيل
وف لحظة هجوم الملل
يزرع جذور السلسبيل
طماع شوية ف المطر
وبراح يساع المستحيل
دواره حضن للغلابة
لا كان وسية
او خطابة
رافع رايات شاربة العنب
قبل اختماره
دارس مساره
وازاي وليه
رافض يوشوش الودع
أو ف العقد
ينفخ لحد ما ينقطع
حيل الغضب
لا كان بأحدب سيِّدة
أو بيضرب ع الصدور
بجنزير حديد
أصل الندم
باسكن قلوب مش منظرة
قابل يدوب
وقت السحر
مليون تقي
ساجدين لبرهة نور تفوت
تلم نسج العنكبوت
وتفتح طاقات متقفلة
لو كان كده
نفسي أشوفه واشكره
وابوس قدم
والخردلة
منه كنهر
لو بعد يوم
أو حتى شهر
أصبح يتيم
الشاعر وحيد راغب
