.png)
كريم حكيم
شاغر غنائي وشاعر عامية
من مواليد ٢٥ أغسطس ١٩٨٨
من أعمالي الغنائية
تامر حسني ( أحلى كلام )
لطيفة ( من بلدى – ناس كتير – أمي – أنا المرسى )
هاني شاكر ( بلاد البخت – اليوم جميل)
جنات ( برد الوحدة )
محمد رشاد ( اللى قال )
ميس حمدان ( زلزال في قلبي)
وهناك ديوان تحت الطبع وأعمال غنائية أخرى ستظهر للنور قريبًا مع ( راغب علامة – بشرى – هلا رشدي)
حذاري
حذارِ تبقى بكل شيء داري!
وإن كنت داري، عن العِباد داري!
الجَهل نِعمة، العِلم يجهلها
مش شرط مني الحِكمة تقبلها
يمكن عارفها … وعنّي بتداري!
حاول ما تفهمش اللي مش هيفيد
ده الفِهم لو في بدايته هيسُرَّك
بالوقت لما الفِهم كُتره يزيد
لو كان مُفيد … من بُكرة هيضُرَك !
نُص اللي عِرفوا وفِهموا بزيادة
إرتاحوا بعد سنين ألم .. مظبوط
لكن عزيزي الباقي كالعادة
للآن كمان بين الحياه والموت
فَكر تعيش لكن بدون تفكير
يمكن تلاقي حياتَك إحلوّت
و إعلن وفاة العَقل تبقى بخير
فوّت عشان الفِكر بيموّت !
مابقتش باعد سنين
أنا من ألفين و إتنين
مابقيتش باعِدّ سنين !
مابقيتش أهتم بشكلي
ولا بزعل وأسأل مين
هيحل معايا مشاكلي
و القُفة اللي بودنين
من يومها بشيلها بطولي
و الناس اللي بيشكولي
و الناس اللي بتضحكلي
مابقوش الإتنين فارقين
مابقيتش خلاص بستنى
ف طابور اللي بيستنوا
ولا حتى بقيت بتمنى
للناس اللي بيتمنوا
ولا خير ولا شر ف بالي
مابقيتش بعوز ولا حاجة
و يجوز من فترة بعيدة
ماطلبتش يمكن حاجة
غير حاجة أظن وحيدة
الدنيا تسيبني ف حالي
المفقود
المفقود … ضيّع إحساسَك بالموجود
ده المفروض … تقبل في الدُنيا ب أي عروض !!
بس أنت بقيت … لا بتستطعم ولا بتميّز
أصل أنت صحيت … بجراح واخدة ف قلبك حيّز
فبقيت من جرحك مش قابل كُل المعروض
الڤاترينة ب كُل ما فيها من الأنواع
جوة عيونَك فاضية و كُل مافيها إتباع !
خايف يوم ما تفوق على نوع تختاره عينيك
البيّاع يتأسف و يقول لَك مِتباع !
و الموجود … من بُكرة تشوفه كمان مفقود !!
كريم حكيم
شاعر غنائي
عناية مكتب القاهرة مدير التحرير ومدير مكتب القاهرة شاعر الأمة محمد ثابت
