وِجْهِكْ أجملْ مِنِ الفُلّْ
وْمِنِ القمرْ لمّا يْطُلّْ
لمّا الشمْسْ الظهْرِ بْتِحْمى
تِحْتِ رْموشِكْ بلْقى الظٰلّْ
٢-
بس عنك مش مشغولْ
ووقتي الك على طولْ
إلَكْ كلِّ الثواني
وْمعاها كلِّ الفصولْ
٣-
بِحَنْحِنْ على القمُّورهْ
قلبي مِثْلِ العصفورهْ
وِجْهِكْ بِسْحرني بْجمالو
وْبالواقعْ أحلا مْنِ الصورهْ
٤-
بتْمنّاكِ جنْبي تْكوني
بخبّيكِ جوّا عْيوني
وْلمَّا تْنامي بٰتْغطّيكِ
طولِ الليلِ رْموشِ جْفوني
٥-
انتِ اجمل من ورداتكْ
شو بعشقهمْ عويناتكْ
بدي بوسه او تنتينْ
لفطرْ عسل بِحْياتِكْ
٦-
قلبكْ حلوتنا وْنبْضاتووووو
بَحْلِفْ حلوتنا بْحَياتو
وِالثغْرِ العسلْ نِيَّالوووووو
يلِّي بِحصِّلْ بوساتوووو
٧-
حلوتنا كِيفِكْ هالأيَّامْ
وْكيفو معاك الغرامْ
بوساتِكْ صارتْ قليلِهْ
كْتيرْ حلوتنا حرامْ
٨-
بَدْنا نْحلِّي الشفايفْ
بْبوسهْ بْطَعْمِ القطايِفْ
هديِّهْ منِّكْ حلوتنااااا
محبوبةْ قلبي لَعاطفْ
٩-
مِنْ شهَرْ زائدْ يومينْ
ما شُفْنا ستِّ الحلوينْ
وْلحتّى ناخدْ بوسهْ
بدنا وساطِةْ بوتِينْ
١٠-
مِنْ شهَرْ زائدْ أسبوعْ
قلبي مِنْ هجركْ موْجوعْ
فكِّي حلوتنا الإضرابْ
كرمالِ النبي يسوعْ
١١-
ما أحلا الكِلْمِهْ بِالثِمْْ
بحبِّكْ يا بنتِ العمّْ
وْيا ربِّي تْسهِّلْ علينا
لحتّى الشمِلْ يِلْتَمّْ
١٢-
جوّالكْ حلوتنا مجنونْ
عمّْ بِتَلْفِنْ هونِ وْهونْ
لو تلفنْ عليّهْ مرَّهْ
كْتيرْ بَكونْلو ممْنونْ
١٣-
بْتنْجنِّي مثلو ساعاتْ
يا أحلى أحلى الستّاتْ
هاتي بعْملْو تصليحْ
مقابلْ عشرْ بوساتْ
١٤-
بحبك يا بنت العمّْ
وْيا ربي الشمل يلتمْ
ويخلص قليبي وقليبكْ
مِنِ الشقا وْمنِ الهَمّْ
١٥-
الوردْ بِصبِّحْ علينا
وْلبوسهْ بِنادينا
وردِ خْدودِكْ حلوتنا
مِنِ القبِرْ بِحْيِّينا
١٦-
نعسانِ الليلهْ القمرْ
وْشبَّاكِ الغزلْ مقْفول
وِاعْتذرْ عنِ السهَرْ
وِإوْعي يِتْسكَّرْ عَطولْ
١٧-
بفْدي روحي كرمالو
هالقمرْ يا جمالووو
عمّْ بِحْلوِّ بِزْيادهْ
دايِرْ بالو على حالو
١٨-
ليشِ خْدودِكْ لونِ الزهْرْ
قالتلي مِنْ كُتْرِ الحَرّْ
قلتلها قولي الصحيحْ
قالتلي لمَّا تْغازلني
مِنِ الخجَلْ خدِّي بِحْمَرّْ
١٩-
قالتلي: حالي good
قلتلها : حبْي عن جـدّْ
قالتلي طبعاً: قلتلها
أعطيني إكْراميِّهْ
بوسهْ منِّكْ على الخدّْ
٢٠-
على خدِّ الحلوهْ خالْ
وْعلى رأسٰ الحلوهْ شالْ
وْصدرْ الحلوهْ مْجنِنِّي
بِتْحرَّكْ يمينِ شْمالْ
٢١-
وْعلى خْدودِكْ هالحلواتْ
عمّْ تِضْحكْلي الغمَّازاتْ
زادوا لَوِجْهِكْ جَمالو
وْمِنِّكْ غِرْنِ الحوريَّاتْ
٢٢-
لا بِبْلادي وَلا بِالْكٌونْ
شُفْنا مِثِلْ هالِعْيونْ
وْأنا واللهِ حلوتنا
بْوِجْهِكْ وِعْيونِكْ مفتونْ
٢٣-
لمَّا بِطْلعِ الحبيبْ
عَطولِ الشمِسْ بِتْغِيبْ
نورِ عْيونِكْ بِضوِّي
عالِبْعِبدِ وْعالِقْرِيِبْ
٢٤-
مغْرورِ الحلوْ بِحالو
بِطْلَعْلو عارفْ جَمالو
لو كانِ الحلوْ بالصينْ
بَروحْ مـشي كِرمالو
٢٥-
بدّي مْنِ الحلوهْ جوابْ
طِلْعِ القمرْ وِلَّا غابْ
يا حلوهْ عيونكْ سحرتني
وِالقَلِبْ عَفْراقُكْ ذابْ
٢٦-
بشوفك حتى بالمنام
وبنحكي عن الاحلام
وْلمّا بنصحا حلوتنا
بْننسى كل الكلام
٢٧-
بيني وْبينِ عْيونِكْ حربْ
كلامي حقيقي مَنُّو كِذْبْ
كمْ سهْمِ بْتُضْربني باليومْ
وْأنا بَقْصفْها بْسهمِ الحبّْ
٢٨-
إنتِ أجملْ شي بالكُونْ
وْآآخْ مِنْ سِحِرْ لِعْيونْ
لو شافٰ العاذلْ عْبونِكْ
بِفْهَمْ ليشْ أنا مجنونْ
٢٩-
عيونك عم بتراقبني
بس والله بتعجبني
والفرحه زي الاطفال
لمّا عيونك تغمزني
٣٠-
بتْراقِبْ ستِّ الحلوينًْ
عْيوني بْتِتْطلَّعْ عَ مِينْ
ما بْتعْرفْ إنُّو عيوني
ما انْشالتْ عنها مْنِ سْنينْ
٣١-
لمّا عْيونِكْ ليلِ نْهارْ
بْتبْقى معي يا عشْتارْ
شو عاوزْ أكترْ مِنْ هيكْ
قوليلي واللهْ محْتارْ
٣٢-
الخيِرْ،لمّا تْكوني فرحانِهْ
وْقلبي مِشّ٫ عمّْ بِعاني
وْيا حبِّي لمَّا نْحقِّقْ
وَلَوِ بعضِ الأماني
٣٢-
شفْتْ خيالكْ بالمنامْ
وِحْكينا أحلا كلامْ
قلتِلِّكْ فيكِ هيْمانْ
وْبُعْدِكْ لو ساعهْ حرامْ
٣٣-
راجعلِكْ بعد قليلْ
والحلوْ باينْ بخيلْ
بدْنا بوسهْ حلاوِتْها
مِثِلْ أعنابِ الخليلْ
٣٤-
قالتلي الحلوهْ Goodnight
بدْري يا ستِّ الحلوات
أخذْنا بوسهْ يا حلوهْ
وْوَعَدْتِ بْعشَرْ بوساتْ
٣٥-
كيفِ عْيونكِ الحلوينْ
بْوِجْهكْ مِثْلِ القمرينْ
أعطاكِ الخالقْ جمالْ
وِصْلتْ أخبارهْ للصينْ
٣٦-
يا أجملْ عيِنينِ وْرسمْ
نسُّيتيني حتى الإسْمْ
ما شْفِتْ بِبْلادِ الغربْ
أحلى منِّكْ وِجْهِ وْكَسْمْ
٣٧-
أنْعَمْ مِنْ أوراقِ الوردْ
محبوبةْ قلبي هالخَدّْ
بُسْتُهْ آلافِ المرَّاتْ
وْما شْبِعِتْ حلوتنا بَعْدْ
٣٨-
بوساتِكْ بِتْعَبِّي الراسْ
وِبْتِسْكرني مِثْلِ الكاس
تعالي نِشْبِكْ إيِديِنا
وْشو بِدْنا بْكلامِ الناسْ
٣٩-
مِثِلْ وردِكْ ما في وردْ
يلِّي حبِّيتِكْ عن بُعْدْ
فتَّشْتِ العالمْ شرقُ وْغربْ
أجملْ منِّكْ ما في حَدّْ
٤٠-
جوالك مثلك مجنون
وْبالوقْتِ الحَرِجْ بِخونْ
وْبالوقتِ العادي شغَّالْ
دَخيلْ قلْبو شو ملعونْ
٤١-
كلِّكْ ذوقْ
وْقتلني الشوْقْ
اه لو مِنْ هالخدِّينْ
بوسهْ حلوتنا أذوقْ
٤٢-
وانا فيك عمّْ بدوب
وْياما دابت فيك قلوب
بعمري والله ما حبيت
مثل حبّك يالمحبوب
وِخْدودِكْ ما أحلاها
بْلونِ الشفقْ وقتِ غْروبْ
٤٣-
العسل جنب تمِّكْ مُرّْ
رأيي فيكِ وْأنا حُرّْ
ما حدا بالدنيا غيري
كشفْ حبِّي هذا السرّْ
٤٤-
ما عادتْ تكفي البوسات
بدنا أكتر :اغراءات
شو عندك حلوتنا هاتي
وِْلا تْقوليلي الوقِتْ فاتْ
٤٥-
عْيونِكْ هِيِ نقطة ضعفي
وضعفي ما بقدر أخفي
بعشقهنْ يا حلوه كْتيرْ
أوعي تِعْتقدي نِتْفِهْ
٤٦-
بس اكرموا علينا
راح نعطيكم عينينا
قلتوا استنّونا يومينْ
استنِّنا وْما جٰيتونا
٤٧-
يِخْسى بعدِكْ كلِّ الحبّْ
ما عشِقْ غيرِكْ هالقلبْ
غيرِكْ كلِّ المعْجباتْ
كلِّ غرامُنْ لُعْبُ وْكِذْبْ
٤٨-
يا حلوهْ شو بدّكْ مِنِّي
سحْرِ عْيونِكْ بِجَنِّنْي
لوِ حبَّتني Miss الكُوْنْ
بَحْكيلَهْ حِلِّي عنِّي
٤٩-
بنسى الدنيا وْما بنْساها
مُرَّهْ هالدنيا لوُلاها
أحلى عِيشِهْ بتْمنَّاها
أقْضي هالعمُرْ معاها
٥٠
على نت هالجيران
محبوبي دوما سهران
ولما بقطعولو النت
بمضِّي يومي حيران
———————-
شعر:عاطف ابو بكر/ابو فرح
