افتتاحية الأوبريت الغنائي
“كاني وماني”
تأليف وأغاني: إلهام عفيفي
الراوي:
أول يوم من عمر الدنيا
كان على أرضي
جه من بعده كتير أيام
واليوم عندي بعمر طويل
يمكن سنة.. يمكن سنتين..
يمكن ألف
الراوية:
عمر الحق في بلدي ما مات
ممكن يغفل .. ممكن يمرض
ولا تجيله ساعات وساعات
لكن لازم ييجي اليوم
نمسح فيه كل الغلطات…..
مليون مرة سبنا تاريخنا
اللي صنعنا نوره بدم
بتسجله احقاد اعادينا
الراوي:
عمر ما شافوا فيه غير جهل
طب يا اخوانا… اللي يضفر مركب شمس
واللي بنا لنا الهرم الأكبر
واللي رسم في جدار المعبد…
كل حياته
واللي صمم.. واللي هندس
واللي طبب .. واللي علم
قولوا منين هايجيله الجهل… فين العقل
الراوية:
لما يقيس الميه في نهرالنيل
لما يسجل ف التقويم
كل فروض النور والليل
لما يحنط تحت الأرض
وفوق الأرض
لما يقدم ألف دليل
إنه صاحب أول رسم لأول حرف في كل الكون
الراوي:
أول واحد علم كل الناس تعيش
ازاي تاكل .. إزاي تشرب
ازاي تزرع لقمة عيش
ازاي تعمل نغمة جميلة
تصبح لحن لحب يعيش
ازاي تعبد رب الناس
الراوية:
أصل المصري أول واحد
كشف السر في ضي الضي
أول واحد كشف السر في لحن المي
أخد الموجة في صوت البحر
حطها غنوة في صوت الهارب
الراوي:
كان المصري ف كل الدنيا
قبل ما نعرف شرق وغرب
أول من علمنا الوحدة
مينا نارمر
ضم شمال النيل وجنوبه
سجل لنا كل انتصاراته
لوحة تشهد أن تاريخنا
هو تاريخ الدنيا بحالها
الراوية:
إخناتون رمز التوحيد
رمز عقيدة ابن النيل
الله واحد.. الله قادر
الله حاكم كل الدنيا
كل بيوت الدنيا يا عالم
طوبة طوبة بعقل المصري
الراوي:
كل علوم الدنيا بدأها
عقل المصري وفكر المصري
كل ثقافة وكل تاريخ
فكر فيه في بدايته المصري
الراوية:
أول ملكة في كل الدنيا
كانت حتشبسوت مصرية
الراوي:
إحنا ح نحكي كل القصة؟
الراوية:
لأ مش ممكن
الراوي:
نص القصة؟… برضك لأ
الصوتين معا:
كل القصة.. إن المصري
أصل النور في عموم الدنيا
تبدأ منه كل بداية..
تبدأ منه كل بداية
————–
افتتاحية الأوبريت الغنائي
“كاني وماني”
تأليف وأغاني: إلهام عفيفي
