الله يصبحكم بالخير يا وجوه الخير … بدي اخرفكم امبارح شو صار معي .. ميشان الواحد يتعلم من كيس غيره .لانه الشاطر اللي ما بتعلم من كيسو.. ..
امبارح بقينا معزومين على خطبة عقبال اولادي و اولادكم و بناتي و بناتكم …و ما شاء الله ..اللي يديم الافراح و الليالي الملاح عند الجميع ..بقا عند الحمارشة امبارح خطبتين و كل وحدة في بلد.. و حدة في يعبد و وحدة في طورة بعد شجرة العاروس اللي حكينا عنها قبل فترة..
رحنا على العاروس الأولى في يعبد و ما شاء الله عن الحفلة كلشي مليح و بجنن .. و الكل يقول لي عقبال اولادكم .. و انا اقول بوجود الله و وجودكم .. ان شاء الله..
لا.. و في وحدة بتوشوش فيي😁بتقولي ياللا نقيلك وحدة من هالبنات اللي هون .. ياللا خلينا نفرح لك .. يا ويلي علي .. ما علينا.. بس الصحيح انا مبدخلش باختيارات اولادي .. همي حرين .. شو دخلني.. يعني أن شاء الله لوقته .. لا سمح الله اذا ما انبسط معها بصير يحط اللوم علي .. و انا مش حمل لوم 😁هم احرار من وين بدهم ان شاء الله من بلاد واق الواق..
بس الصحيح صرت اسمعها كتير .. اللي بدها عروس ..تروح عالعروسات..البنات هناك كلهن عرايس .. نقي و اكتب كتاب☺.و هسا تذكرت ..وحدة لو تدروا من وين بقت تدور لابنها على عروس .. بقت على ترويحة البنات من المدرسة ..تروح تنقد كل البنات .. بقت بدها لابنها بنت بيضة .. اهم اشي تبقى بيظة..و بعد البياظ كلشي بهون ..🐣ميشان تخلف #كتكوت من البيظة بصيح🐥
كالعادة طولت بالخريفية 😑..
المهم .. انا بدي اطلع من القاعة .. هاظ #التحديث الخلنج .. لتطوارت طريقة حياة الناس .. و ما شاء الله انحرجت و صرت بدي اسلم ع ناس اشي معارف و اشي قرايب .. و لازززززم اسلم و كيف الحال .. اسطوانة شغالة و هيك.. و ابني برة بدو يودينا ع طورة عند العروس الثانية ..يعني انشغل بالي بمية شغلة .. ..قال في ناس كثار بقولوا .. اعملي حالك مش شايفة حدى ميشان شغلة السلام بالكف و توابعه😄 .لانه هيك ممكن تضطر الوحدة تسلم على كل اللي بالقاعة .. و تخيلوا الوضع 😎 هاي بنعرفها و اللي بحدها ماااا منعرفها.. بس مجاملة و جبرة خاطر يمكن و ذوق إنساني.. و يعني ما بنلحق سلامات …عالكل ..
اجا المهم .. طلعت بعد كل السلامات و طبعا لابسة كعب عالي .. منو اناقة🤗 و منه بعطيني شوية طول .. لانه انا مش طويلة .. يعني عصفورين بحجر .. بس هالحجر بقا بدو يكسر رقبتي.. القاعة الها اكم درجة .. بس بعد آخر درجة و انا عقلي سارح بأحداث القاعة .. في جورة صغيرة بالزبط محل خبطة القدم .. يمة يا حبيبتي الله يرحمك .. ما حطيت اجري الا انا بتلولح بالهوى.. يماااااا هاظ انا قاعد بوقع…ييي ع هذيك اللحظة..يمة ما اصعبها.. رجع لي بالي بهذيك اللحظة .. صرت اقول بحالي .. واقعة يعني واقعة ..يعني اجت الواقعة … بس يا رب تحما ظهري ..لانه وقعة ..يعني .. من الاخر عقولة الشباب الجديدة…..و فعلا وقعت.. الصحيح .. يعني أباااااي ما اقرب الموت ع بني ادم … الله يرحمنا برحمته .. المهم وقعت .. مثل بطة اجتها رصاصة و هي بالسما.. الحمد لله على كل حال.. بس شو ! اهم اشي .. الحمد لله ظهري سليم ..فش اشي ..بس وين الوجع القوي ..بالقدم .. شكلها .. لا مش كسر .. بس اكيد رظة.. الله يعين اللي بنكسرو ..الله يعين اللي عندهم جروح ..الله يعين هالشباب اللي بتجرحوا و بتكسروا بهالظروف القاسية الصعبة .. . .
المهم وقعت و الوقعة رظت مشط القدم ..و اتجمعن هالنسوان علي .. الله يحماهن و يفرحهن بولادهن و يعطيهن الحجة .لانه في منهن بنات و في معندهشن أولاد.. يعني وقفتهن معي عنجد انعشتني.. بس هاي المواقف .. بفيع العياط على الواحد ..مش عارفة ليه ..عزة نفس ولا محبة للناس اللي بتوقف معنا و لا شو بعرفش..
كل هالخريفية مش بس عشان تقولولي سلامتك .. في أمور ثانية حبيت اقولها.. بس اهم اشي ..لازم نراقب خطواتنا.. لانه في خطوات قاتلة .. .. و خلي بالك مع حالك و انتي ماشي .. ما تتخلى عنه لأي حدى😊 لانه هو راس مالك بهالحياة ….و يعني يمكن اخطاء غيرك انت تقع فيها .. يعني هاي الحفرة..هاي غلط غيري .. بس بقت ممكن اتجيب اجلي .. الله قدر و لطف .. و لو شوية انتباه مني كان انتبهت لهاي الحفرة .. و كان ما اضطروا اولادي و جوز بنتي ياخدوني على المستشفى قبل نص ليل شتوي طويل .. من شدة الألم..و ..الله يوفقلي اياهم و يوفق لكل عين رجاها ….
و سلامة تسلمكم🚶♂️🚶♀️انتبهوا و انتو ماشيين من حفر الطريق ..
