بالفيديو /منظمة همسة سماء الثقافة الدولية الدنماركية ومؤسسة دولي نت وبمناسبة يوم الام تكرم الاستاذة أسماء إغبارية من ام الفحم

بمناسبة يوم الام وبحضور دولي كبير نظمت همسة سماء الثقافة الدنماركية ومؤسسة دولي نت الاعلاميةوبالتعاون مع ملتقى رواد ومواهب حفل استمر زهاء 4 ساعات عبر المنصة الدولية همسة ومن المشاركات

الاستاذة أسماء إغبارية أم الفحم فمن هي اسماء :

اسماء اغبارية، مرشدة تربوية، موجهة أسرية، مدربة قدرات بشرية، ومديرة مركز واحة النفس لتطوير الذات – ام الفحم. ٣٦ عام.
قصتها ؛
انا عشت بطفولتي ببيت ممنوع التعليم او العمل للبنت! بكفي تخلص اعدادي.. ومن هناك بلشت التحديات حيث ان كنت اتمتع بافكار غريبة الاطوار وشعور مرهف، كنت احلم كثير بس ما كنت احكي عن احلامى لان ممنوع نحلم..😕 اتحديت اكمل المرحلة الثانوية والبجروت بكل قوة واصرار وحصلت على علامات عالية💪🏻. وبعدها صار ممنوع احكي بالتعليم او الشغل.. هذيك الفترة استغليتها للقراءة والثقافة العامة، فكنت اعطي لنفسي كل فترة انهي كتاب قراءة واكتب مقالات بالجريدة وانشر، ومع الوقت صارو يمنعوني انشر! فأصريت ونشرت باسم مستعار عشان اكمل مسيرتي.. و كان اهم شيء انو البنت تتزوج، ومن هناك صرت احلم اني اتزوج! واتزوجت بكير كثير وهناك بلشت ارسم حلمي وخطوات تحقيقه. كانت الصعوبة اني انا بحمل لطفلي الاول وصعب اطلع ع الجامعة وصعب أجهز نفسي لامتحان البسيخومتري.. هناك صار عندي دائما سؤال يراودني كيف لازم اصل؟؟ وهذا كان المفتاح السحري ! 🔮. هناك بدأت مسيرتي اني دخلت اتعلم دورات في كلية الدعوة الاسلامية. كان شروط القبول سهلة والمبلغ المادي سهل لكن هناك كنت ارى نفسي انو انا بمكان اخر، مش هذا الى بدور عليه وهناك بلشت اجتهد اقنع زوجي اني لازم اطلع. هو ما عارض التعليم ابدًا، انما عارض الصعوبات بين اطفال، بيت وتعليم..📒👨‍👩‍👧‍👦. لكن كان عندي اصرار اثبت حالي قدام الجميع ونفسي، فصرت اجتهد، ابرز نفسي بالبيت وتوفير المصاري والتطوع خارج البيت مشان اثبت انني بغدر. هناك بلشت مسيرتي التعليمية بالجامعة المفتوحة فصرت اتعلم واربي باطفال اثنين وحامل بالثالث.. ما كان حدا يساعدني او حتى يشجعني ع التعليم! ان كان من اهلي او من اهل زوجي، الكل يحكيلي اهم اشي بيتك وولادك والكل يحط قدامي صعوبات كبيرة..!! بهذيك المرحلة مرقت بتحديات كبيرة.. ادرس طول الليل وولادي نايمين والصبح اكون معهن، وهن بالمدرسة اكون انا بالتعليم.. وصرت اشتغل دروس خصوصي ومعلمة بديلة في المدارس ومعلمة في مركز ثقافة لدورات حتى اجمع المبلغ المالي المطلوب..

بعد ٣ سنوات تعليم بلش حلمي يكبر اني افتح مركز مستقل واشتغل فيه✨. وفعلا بلشت ارسم المركز وتفاصيله على ورق واكتب البرامج والفعاليات اللي بدي اعملها وادرسها.. وصرت اشتغل واعمل محاضرات بمبلغ رمزي، بس هالمبلغ كنت اوفره واشترى فيو شيء من لوازم المركز اللي سجلتهن على الورقة. بلشت بغرفة صغيرة كثير مع طاولة بلاستيك وكراسي بلاستيك استقبل صبايا واعمل ورشات ومحاضرات وفعاليات.. وصرت كل مبلغ احصل عليه اشترى مجموعة اغراض لتطوير المركز .. لكن فجاة حصل تغير كبير بحياتي واللي ما كنت اتوقعه.. وهو الانتقال من البلد اللي كنت ساكنة فيها الناصرة للبلد التى اسكنها حاليا ام الفحم. وهناك بلش التحدي الاكبر والصعوبة الاكبر. انا لحالي في ساحة المعركة لا سند ولا معيل! لكن قلت بنفسي انا بلشت ومستحيل اوقف ولعل الله يحدث بعد ذلك امرا🤲🏻. هناك بكل قوة نقلت اغراضي لمكان جديد كان اكبر من المكان الاول. صحيح خسرت زباين ومدارس كنت اتعامل معها فلازم ابلش من جديد.. لكن كانت المفاجئة اني اتوجهت للشخص الاول، كان سامع عني وبعرفني وكان حابب يتعامل معي..أنتقل للمؤسسة الثانية الاقيها بتعرفني وسامعة عنى وحابة التعامل معي..! وهيك صار عندي زباين كثير ومؤسسات كثيرة بفترة قصيرة جدًا 😍

. شوي صار عندي تحدي جديد انو لازم اطلع من المكان اللي انا فيه لأنتقل لمكان اخر وألاقي نفسي بمكان اوسع واكبر من الاول. بدأت ارتب اموري من جديد وبهذيك الفترة كانوا اولادى كثير صغار بحاجتي وحاجة دعم وزوجي مشغول بشغله ومش متفرغ يكون معي غير مساندة كلامية.. واهلي مش كثير مشجعين الاشي بالعكس شايفين انى بعمل غلط كبير! فأنا لحالي بيتي وولادي وشغلي وكانت ضغوطات كبيرة كثير عليي.. شعرت بالوحدة كثير والغربة كثير بس كنت مصرة اوصل✨. خلال اقل من ٥ سنوات وجدت نفسي امتلك مركز كبير مجهز بادوات حديثة ببرامج مميزة له مكانته المهنية، عندي طاقم مهنى يساندني، عندي اولاد مميزين ومتفوقين الهن بصمتهن معي بالمركز، عندي زوج داعم كلاميا ونفسيا وعمليا واله بصمته بالمركز وبحياتى المهنية، عندي اسمي المهني المميز ومكانتي الاجتماعية المميزة🤩
نصيحتى دائما … كوني مميزة ولا تبالي بصعاب الحياة. راح اصل لهدفي اذا سجلت هدفي ونويت اجتهدت وحطيت خطوتي الاولى في المسير✌🏻 فكان شعاري دائما لا تقفي عند عثرة في الطريق فالتميز يحتاج لقوة واصرار