الإجابة قبل ما تسأل سؤال
البكاء حولها صحرا
والغزال ترك الملاعب
وانتحى تحت المحال
كل شىء ترك الجبلة
والأهلة
ف سيل غيام
المراصد عاجزة ترصد
الولادة
م السعادة
شطبت وجودها م الدفاتر
والفلاتر بطلت تفصل ملوحة
أو تحلى م المعادن
المساكن
للنمل
خافت يهدموها
جنود نبى
وأفصحت حلو الكلام
إيه باقى لنا غير شوية خوف
وحزمة م الوجل
وعيون
النوم فارقهاواندهس
حلم بينعى اللى كان
وبيشرح اللى حادث
واللى راح ييجى بموجة
تشبه الطوفان بناره
عار بيزحف
مش تحت منا
بل فوقينا
مع إن
كل حاجة بإيدنا لو
قومنا ساقنا
وامتنعنا م اللى ساقنا
وحددنا سوقنا
فين هاندى
وفين نمنع عرقنا
لحد بيتنا
الوقت جالنا
نفرح الأرض اللى أعطت
والسما
اللى باحت ثم أطت
كل شيء ما بقاش مغلف
كل شيء على عين تاجرنا
إنت مين
إنت فين
إنت ويا ولا ضد
إنت لو قدمت سبت
راح يجيلك ألف حد
يا الله نغمس
القلوب ف طست طه
وندى للمحتاج حياته
ونمسح الحزن اللى باجرى
فى عيون الأمهات
والفزع
اللى بات جاثم بيعوى
موت فى عين طفل بيرضع
أو
طفل بيحمل مسؤلية عيلة مات
أبوه فى حضن أمه
ودنيا ضاقت
خرم إبرة
المثابرة والمصابرة
أوانها فات
والبلح الإمهات
بس لو نعرف نقولها
لأ
ولأ
وألف لأ
الصفحة راح تنقلب
والهرم يرجعله رأسه
دا اللى فاسه عارفة أرضه
عمره ما يمد الإدين
