شعر وشعراء
درر الشعر* كريم النفس الشاعر / سعد بن زمانان
لوحة شعرية تميزت بروعة التصوير وقوة التعبير رسمها شعرا وجسدها مشاعرا وطوع مفرداتها بتمكن الزميل الشاعر القدير سعد بن زمانان – معد ومقدم برنامج ديوانية الشعراء بتلفزيون الكويت- وأهداها إلى أعضاء نخبة الشموخ وتحمل هذه اللوحة عنوان ( كريم النفس )
أحب اللي ليا من اذن المدن يفز إبحال
توضى وراح بيت الله وصلى طابت أعماله
وأحب اللي كريمه دايم نفسه كريم افعال
وأحب اللي حكيم الراي وسمحٍ دامٍ باله
وأحب اللي يعرف الوصل وعلومه علوم إرجال
وفيٍ بالوفا وفّا وعالي دوم منزاله
وعلى الهمّه وبه ذمّه ويكسب من حلال المال
وسعد نوّه به مروّه وخوّه تعجب أفعاله
صدوقٍ وأبيض ٍقلبه بياض اللول مايحتال
ووافي صافي النيّه ونهج الحب منواله
وعالي مجدها رامه شهامه للكرامه نال
على التوجيب والترحيب فعل الطيب يسعاله
وصحيبٍ لانخيته بالشدايد يرتكي لثقال
وصحيبٍ بالرخا عاجز خفيف الحمل ماشاله
إطبوع الناس مختلفه من الأفعال والأقوال
أحد نورٍ على ربعه وأحد مافالك إبفاله
سوات إعدودها مختلفةٍ بإقصارها وإطوال
هماجٍ بعضها ولاّ بعضْها صافي إزلاله
وأحب الشعر والمعني وأحب الجزل بالأمثال
وأحب الأبل ويا الخيل وأحب الطير واهواله
وأحب امشي مع الصحراء إسهالها وجبال
وأحب الغيم لا لاحت إبروفه وهل هماله
وخضارٍ غيّر بوجه البسيطه والربيع أشكال
وكلٍ بالحيا بشّر رفيقه ثم تعناله
*سعد بن زمانان*
