بداية هي ست مشهورة.. تحية كاريوكا ما انت عارفها.. وهو فايز حلاوة ممثل ومؤلف مسرحي.. الاتنين اتجوزوا هو الزوج رقم 13 في حياتها.. ودي جوازة فضلت 18 سنة.. يعني جوازة معمرة..
متعرفش ايه السبب اللي خلى المشاكل تحصل ما بينهم.. بس هي مشاكل كبيرة لدرجة انها طردها من الشقة بهدوم البيت.. وناس بتقول بلبس النوم.. بس هو مش موضوعنا.. خد منها كل مجوهراتها. لدرجة انها نزلت من سلم الخدامين عشان محدش يشوفها.
الفنانة رجاء الجداوي بنت اخت تحية بتقول انها رفضت تسكن عند أحد.. وخدت شقة فوق السطوح.. وكانت بتروح تعمل خدمنة في السيد البدوي.. الست صاحبة البيت.. طمعت في الشقة وراحت رمت العفش بتاعها برا.. برا بمعني برا.. وراحت رجاء الجداوي استلمت الحاجة من القسم.
وراحت تحية للشيخ الشعراوي عشان يطلقها من جوزها.. فايز حلاوة حط كذا شرط.. عشان يطلقها:
– ياخد شقة الزمالك.. الشقة الكبيرة .
– متاخدش مجوهراتها.. وملابسها التي صورت بها الأفلام،- ترجع تصور مسرحيتهم “يحيا الوفد”، عشان يبيعها للتلفزيون.
الماكيير محمد عشوب في برنامجه “ممنوع من العرض” قال ان الشيخ الشعراوي جاب الاتنين في بيته يوم شم النسيم.. الشيخ الشعراوي قاله هتقبل بحكمي يا فايز.. فقاله طبعا يا مولانا”..
فقال له “الشعراوي”: “أنا حكمت إنك تدفع نفقة متعة 500 ألف جنيه للحاجة تحية”.. فايز مدفعش ومراض يسيب الشقة.. رفعت هي قضية عليه.
وبعدين بطلت تحضر الجلسات بتاعت القضية.. الشيخ الشعراوي سألها قالها ليه يعني دا حقك.. قالت له : “يا مولانا، فايز راجل متجوز وعنده بنت ومعندوش شقة، هياخدهم ويروح بيهم فين، هو هيتبهدل، وأنا خلاص كبرت ولا أقدر أنضف الشقة ولا أصرف عليها، والشقة اللي أنا قاعدة فيها كويسة”؟
وفقا لكلام عشوب الشيخ الشعراوي رد عليها: “أنا ابتديت أغير منك يا تحية، ابتدا يتبنى ليكي قصور في الجنة ملهاش عدد”.
كبرت تحية كبرت شوية حلوين.. وفي يوم مروحة لقت بنت متسابة قدام باب شقتها بنت سنتين.. جريت بالبنت عالشيخً الشعراوي، وقالت له اعمل ايه فيها، قالها “يا عبيطة.. ربنا بعتلك حاجة تاخد بايدك للجنة وتقولي اعمل بيها ايه… ربيها طبعا”.. وفعلا ربت البنت.
تعبت تحية قوي.. تعب الموت.. راحلها طليقها فايز حلاوة، ودخل عليها اوضة المستشفى، لقاها تقريبا في شبه غيبوبة
فقالها “يا حبيبتي يا توحة، ألف سلامة عليكي.. إنت الرقدة دي مش ليكي يا تحية!!”،
فتحت عنيها وقالتلي “يااااه يا فايز إنت لسه بتحبني يافايز؟”، فارتمى على صدرها وهو بيبكي وقالهاً: “وحياة النبي تسامحيني يا تحية!!”.. قالتله مسمحاك يا فايز.
بس يا سيدي.. والله يسامحنا جميعا.
المصدر : حكايات الزمن الجميل
