زوزو نبيل ..أو مثل ما اسمها مكتوب فى الاوراق الرسمية عزيزة امام حسين.. عاشت حياة قاسية جدا وهى صغير*ة لدرجة انها فى سن 13 سنة كانت متجوزة، وبعدها بسنة واحدة كانت أم.

زوزو كانت بتحب الفن من صغرها، لكن اسرتها وتحديدا امها كانت رافضة بشكل قاطع أن بنتها تبقى فنانة، لكن زى ما كانت الام رافضة كانت زوزو كمان رافضة انها تستسلم لاى حاجة تمنعها عن تحقيق حلمها، صحيح هى ما كنتش بتعمل حاجة غير انها تفضل تعيط لامها لكن اهو نوع من المقاومة.

المهم ان الايام مرت ولقت الاسرة ان البنت ام ضفاير صغيرة لسه قادرة تقاوح وتقاوم، يعملوا ايه عشان يخلوها تنسى الفن ؟ يجوزوها، مين ؟ مأمور سج*ن، والراجل كان واضح أنه مأمور فى السج*ن وفى البيت، لدرجة ان حول بيتها لسج*ن صغير كانت ممنوعة تخرج منه، وكانت الفرصة الوحيدة لخروجها هى أنها تتغطي من فوق لتحت.. وتنزل مع حماتها تتمشى لاول الشارع وترجع، قبل ما جوزها يرجع، من شغله اللى بينه وبين البيت 10 متر فقط.

طبعا واحدة متمردة زى زوزو مقدرتش على الوضع ده كتير فاتطلقت، وراحت سكنت فى بيت صغير فى حارة صغيرة.. وبعد فترة اتعرفت على بنت صاحبة البيت، اللى قالت لها أنها تعرف حد ممكن يخيلها تحط رجيلها على اول طريق الفن، وقد كان.

بنت صاحبة البيت خدت زوزو من ايديها وطلعت بيها على الست أمينة محمد خالة امينة رزق اللى كانت بتصور وقتها فيلم تيتا وانج، فشافت زوزو واعجبت بجمالها، وقالت لها انتى شكلك جميل، بس ممكن تعر*ى رجلك شوية، فوشها جاب الوان وقالت لها : بتقولى ايه يا أبلة؟ فردت الست أمينة بسخرية وقالت : أبلة .. إحنا في مدرسة يا روحي، وطبعا زوزو معرفتش تعمل ايه او تقول ايه فخدت بعضها وهربت.

تمر ايام وايام وتصادف زوزو مسرح متعلق عليه افيشات لزينات صدقى وسنية شوقي وتقف تتفرج عليهم بانبهار عيل صغير فرحان بهدوم العيد ومستنى الساعات تمر عشان يلبسها، فيشوفها مختار عثمان ويقولها: تعالي يا شاطرة، تعرفي تقرأي ؟ فقالت له: ايوه، فقال لها: هل عندك فكرة عن التمثيل فقالت له: ايوه ونفسى امثل بس من غير رقص ولا غيره، فقالها مفيش عندنا رقصات فى المسرحية، ومن هنا بدأت زوزو مشوارها مع التمثيل، وبدأت تاخد ادوار صغيرة لحد ما كبرت وبدأت اسمها يتعرف فيقرر يوسف وهبى يروح يتفرج عليها، ويسأل عن أجرها فيقولوا له 6 جنيه، فيعرض عليها 8 بس هى ترفض وتقول انها هتفضل مع فرقة مختار عثمان لانه اول حد دعمها، لكن طبعا لما فرقة عثمان اتحلت راحت ليوسف وهبي، وبدأت من مسرحه رحلتها مع النجومية والشهرة اللى استمرت لحد ما ماتت.

زوزو مكنتش حابه أن اسمها الفنى يبقى هو اسمها الحقيقى وعشان كده اختارت اسم “زوزو نبيل”، “زوزو” دلع عزيزة.. اما نبيل فهو اسم ابنها الوحيد اللى است*شهد فى حر*ب 73.
#الهامي_سمير