أنا_الغالطة_خاطر_غالطة_من_اصلها_لحكاية #يلزمك_تعيش_قالب_على_قدر_رؤيتهم_وتصورهم_للسائد

والله الحكاية كما صارت وبحضور الناس

عندي حكاية ما نحبش نخليها في قلبي خاطر بالحق تدل على أن الإدارة التونسية في خطر..
مشيت نعدي في كونكور.. فرحانة برشا قلت باش ننجح فيه على خاطر QCM بالكمبيوتر.. قلت جو كبير تونس امتحاناتها بالتكنولوجيا..
فرحتي مادامتش برشا من قبل ما نبدأ وأنا مخي يهز ويجيب.. تقطعت مليون مرة..
#السبب انو #السيدة_المسؤولة بعد ما خذات مني بطاقة التعريف وقراتها وسجلت حضوري سألتني وقتلي: #تعرف_تقرأ_ماهو..
نقسم بالله جلطتني ولتوه مجلوطة من سؤالها.. ياخي بالحق هذكا حد نيتها؟ وهي زعمة بالحق تعرف تقرأ وقت شافت المهنة مكتوبة في بطاقة تعريفي؟
ثما جلطة سبقتها صارتلي من وضعية مشابهة.. المسؤولة شافت تصويرتي في بطاقة تعريف من غير فولارة.. بقات تثبت فيا خاطر قدامها بالفولارة وقتلي: أنت مُدَيْنَةْ؟ يلزمني نتعرف على هويتك الحقيقية انا كيفاش نعرفك..
قلتلها علاش مادام شكون موش مُدَيْنَ؟ هاكي انت زاده مُدَيْنَةْ.. يا ناس وتشعل فيا (هي شعرها اصفر مصبوغ من غير فولارة).. شعلت فيا وقتلي يزيني من الأسئلة الفلسفية متاعك انا سألتك قتلك انت مُدَيْنَةْ جاوبني اي وإلا لا..
أنا: كلنا مُدَيْنِينْ المسلم والمسيحي واليهودي كلنا على دينا..
هي: هاك مغطية شعرك وبطاقة التعريف من غير فولارة..
أنا: ماينجمش راسي يوجع وإلا عندي هواء وإلا زرستي توجع..
هي: عندك حاجة من زوز يا تمشي تجيب تصويرة بالفولارة لإثبات هويتك يا ماتعديش الإمتحان..
أنا: يامدام راهو بطاقة التعريف والباسبور وبطاقة الصحافة كلهم شعري من غير فولار..
هي: هاني قتلك.. ما نفهم شي.
أنا: نحيت الفولارة وقلتلها هاهو شعري.. ها هو أنا.. والله عيب مادام هذا على الإدارة التونسية أنها تتواصل مع المواطن بالشكل هذا..
زوز مواقف نشوف فيهم برشا عار في حق الإدارة في عام 2020.. منعرفش شنوه يتسمى أما نعرف ان والله العظيم هذكا لي صار.. موش مهم تصدقوني وإلا ما تصدقونيش خاطر للساعة موش مستوعبة لحكاية وحتى وقت حكيت مع مديرها قلي والله لا عندها شي ضدك.. انا اش دخلني في عندها ضدي وإلا ما عندهاش حاجة تخصها اما علاش لا يتم إحترام خصوصية الإنسان قناعاته وحرياته التي يكفلها الدستور..
نسيت باش نقلكم الحوار صار في قاعة مليانة بالمتناظرين.. علاش تعاملني بالطريقة هذيكا قدام الناس.. وعلاش لا تحافظ على الهدوء لإجراء الإمتحان وعلاش وعلاش.. هذا الكل على خاطر فولارة..
نسيت حاجة ثانية، توه تذكرتها في الشارع وبرشا أماكن يقولولي #تفضل_يا_حاجّة..
تعرفو علاش؟ خاطر نرمي فولار اما موش متحجبة قصدي مُدَيْنَةْ كما يقول مخهم البسيط.. ماشي في بالهم الحجاب ساهل وإلا جميع من غطى جسمو متحجب.. انا ما نعملش حاجة غير قادرة على الانضباط لخصائصها وحدودها..

#لا_حول_ولا_قوة_إلا_بالله.. بالحق اخر همي مظاهر الناس وخصوصياتهم.. و يا ريت هالكمامة تكتم عنا أصوات الكثير وتحجب مظهرهم..
#تعبت
#حنان_لعريض