زمان ما كنا نستحي نستقرض رغيف خبز من الجيران الصبح منشان الأولاد يتروقوا قبل المدرسة لأنه العجين بعد ماخمر
زمان كنا نستقرض إبرة البابور وراس البصل وكم حص توم من الجيران
زمان كانت في طاولة لجيرانا أجريها حديد تلف البلد منشان يعملوا عليها مرتبة العرسان ليلة عرسهم
زمان كنا نستعير من بعض الكراسي والطناجر والصواني وحتى الملاعق وقت العزايم الكبيرة
زمان كانت الناس تفتح بيوتها تستقبل ضيوف جيرانها لأنه بيت المستضيف صغير ما بساع لكل الضيوف
زمان كان في تلفزيون واحد بالحي وساحة الدار تساع الكل ليحضروا صح النوم
زمان عمره ما كان حدا يعاير الثاني ولا حدا يشوف حاله لأنه الحياة كانت هات وخود
زمان كانت الناس بسيطة وطيبة وأصيلة ومتواضعة لا تعايرني ولا بعايرك عارفين البير وغطاه
زمان كانت الألفة والمحبة والتكافل والإنسانية الصافية من غير مصلحة
زمان كانت طاحونة القمح اللي بسموها ” الرحى ” تجرش عليها كل نسوان البلد
(الزمان ما تغيَّر نحنا يلي تغيّرنا)
التواصل الاجتماعي
