نجمة رد قلبي تتحدث عن ابطال السينما المصرية.

-حضرتك اشتغلتي مع مجموعة من النجوم زي مثلا عمر الشريف ، رشدي أباظة ، شكري سرحان ، عماد حمدي وأحمد مظهر .. مين أكتر ممثل فيهم كان قريب ليكي وحبيتي الشغل معاه ؟؟

=أحمد مظهر طبعا .. لا أحمد مظهر حاجة تانية خالص غيرهم ، مظهر ده أول ما عرفته كان بكباشي أيام الثورة وكان زميل جمال عبدالناصر واحنا بنعمل فيلم “رد قلبي” لقيته قلع البدلة العسكرية وقال “انا مش عايز ابقى بكباشي انا فنان” ، انا ساعتها قلت ده مجـ. ـنون حد يسيب جمال عبدالناصر عشان يمثل معانا !! .. لكن مظهر انسان عظيم وبقى فنان عظيم وكان قمور ورقيق جدا ، بقاله 40 سنة لحد النهاردة والله العظيم كل يوم الصبح يكلمني في التليفون يقولي “صباح الخير الأميرة انجي موجودة ؟؟” ، ارد
عليه أقوله: “مين ؟! البرنس علاء ولا الناصر صلاح الدين ؟؟ رايح فين وفتوحاتك فين النهاردة يا صلاح ؟” .. يقولي “رايح وكالة البلح اشتري شوية حاجات ، محتاجة حاجة ؟” ..
وهو كمان مثقف وبيقرأ كتير يعني احيانا بنتعزم في السفارة الفرنسية تكون جاية فنانة فرنساوية منعرفهاش ألاقي مظهر قبل ما نروح جاب مجلات فرنساوي وقعد يذاكر ويقرأ عن الفنانة اللي هنقابلها دي ويقعد يمليني يقولي اسأليها عن أفلامها وكلميها في كذا وكذا فدايما قبل ما يقابل حد يبقى عارف هو مين وبيعمل ايه عشان مبيحبش يبقى جاهـ. ـل في أي قعدة وهو اللي علمني كده ان الفنان مينفعش يبقى
جاهـ. ـل ، مخه نِوِر جدا .. وبعدين هو بيحب يصحى بدري وانا كمان وعندي حتة أرض هو بيحب يقعد فيها فنتفق نروح الأرض فأقوله “فوت عليا الساعة 8 الصبح” ، ألاقيه دايما ييجي الساعة 8 إلا 10 دقايق فكنت مستغربة ليه دايما بييجي بدري عن الميعاد ويقف يستناني في الشارع لحد ما انزله فسألته ، قالي “لا مينفعش الست تنزل متلاقيش الراجل وتقف تستناه في الشارع ، لازم الست تنزل تلاقي الراجل واقف في انتظارها” .. يعني هو لحد النهاردة عايش في جو النبلاء بتوع زمان دول ، هو فعلا نبيل ❤️

#يوميات_مريومة