الكاتب الساخر أكرم الصورانى يكتب
[بمناسبة اليوم العالمي للقضاء على العنف ضد المرأة]
من روائع الرأئع …أكرم الصورانى …
…………………..
الكاتب الساخر أكرم الصورانى يكتب
[بمناسبة اليوم العالمي للقضاء على العنف ضد المرأة]
العنف مش بس إنَّك تضربها :
■ لمّا تحكيلك إنتَ بس اسمعني وما تسمعها هاد عنف .
■ لما تصحى متنكدة إن شالله من الهوا وبدهاش تحكي وإنت بدك إياها غصب تحكي هاد عنف .
■ لمّا تكون مفلوزة وما تعمللها يانسون وسكر ولمون هاد عنف .
■ لما تحكيلها يا بنت وما تناديها باسمها هاد عنف .
■ لما مزاجك يُطلب قرشلة وتحكيلها قومي إعمليلي شاي وحضرتك بكامل قواك البطنيّه ومرخرخ عضلاتك على التخت ومستني الشاي يوصلك ديليڤري هاد عنف .
■ لما يجي معاد الغدا وما يكون جاهز وتقلب طوشه لانو السم الهاري مش جاهز هاد عنف .
■ لما ما تحكيلها كل طلعة شمس صباح الخير يا حوب بابتسامه وهمسه وغمزة وبوسه لو ع الهوا هاد عنف .
■ لمّا ما بدك تساعدها لا بشطف ولا باولاد ولا بجلي وكمان ما تحضنها وهيا بتجلي هاد عنف .
■ لما قميصك في أقصى جنوب الغرفه وبنطلونك شرق الخزانه وبجامتك على الأرض هاد كمان عنف .
■ لما ريحة جرابينك تكون مفحفحه وحضرتك مش مغسّل رجليك من 72 ساعه وهيّا بتحاول تبعد عنك وتشرحلك الموقف وإنو في حاجه غلط وحضرتك حَبَكَت معك تحضنها هاد كمان عنف .
■ لما ما تستعمل حاجه اسمها معجون اسنان وما تتحمم وما تقص أضافر رجليك لإنو بشوكوها بالليل هاد كمان عنف .
■ لما تحملها مسؤولية الاولاد كإنها هيا اللي جابت اللي خلفهم واللي خلفهم مش فاضي لإنو وراه سهرة مع الشباب وهاتك يا شدة وشيشه وطرنيب هاد كمان اسمه عنف .
■ لما يطلع قرار هيك فجأة زي الشعر براسك وما تسألها ولا تشاورها ولا كإنها شريكة حياتك ولا جارتك في المخدّة هاد كمان إسمه عنف .
■ لما تحكيلك أنا خلص بَطَّلت أتحمَّل إنت في طريق وأنا في طريق وحضرتك لسّه مُصِر ما تغيِّر تفكيرك ولا تغيِّر جرابينك ولا تطلق سراحها هاد كمان اسمه عنف .
كل عنف وإنتِ بخير حوا
