السلام عليكم
انا منفصل من ١٢ سنة و عندي بنت واحدة كان عندها في الوقت ١٠ سنين . قعدت فترة بعد الانفصال مش عارف اشوف البنت و بعد سنة ونص خدت حكم بالرؤية ، البنت كانت بتتعامل بطريقة مش كويسة معايا .
و كنت بقول بسبب اللي مرت به ، بعد كدا طليقتي تزوجت – الله يسهل لها – طلبت من البنت تيجي تقعد معايا البنت رفضت و الام الام رفعت حضانة لكن البنت كانت عايشة مع امها في بيت زوجها
البنت بعد ما وصلت ١٥ سنة مبقتش اعرف اشوفها ، اتصل عليها اوقات مش ترد عليا و اوقات ترد و تتكلم معايا بقلة ادب . كانت مش بتتصل عليا غير لما تكون عاوزة تشتري حاجة ، لما دخلت الكلية قالتلي عاوزة اشتري لاب توب و اغير الموبايل قولتلها ماشي و قولت اني دي فرصة انزل معاها نتفسح و نشتري اللي هي عاوزاه
قالتلي لا هي هتنزل مع صحباتها علشان بيفهموا في الموبايلات و انواع الاب توب و رفضت اني انزل معاها .
البنت دلوقتي عندها ٢٢ سنة ، من كام شهر قالتلي انها محتاجة فلوس علشان تجيب جهاز عروسة لها و ان البنات اللي في سنها بيجهزوا دلوقتي علشان الاسـعار بتزيد و كدا
.
كل فترة كانت بتعدي عليا تاخد فلوس كنت بقولها انزل معاكي نشتري الحاجات مع بعض بتقولي لا هاخد معايا ماما ، كنت بقولها لما تشتري الحاجات ابقي صوريها ليا و كنت بحاول اشاركها فرحتها علي الرغم من تعاملها السئ معايا
و الي كان مسبب ليا حزن شديد ، كنت معتقد ان تصرفاتي دي هتحاول تمحي الجفاء اللي بيني و بينها .
لكن لقيتها الجمعة اللي فاتت باعته الي فيديو كتب كتابها و زوج امها هو و ليها ، و البنت بتقولي مفيش مبروك يا عمو !!!! انا عمو ؟! و كانت مخطوبة من ٦ أشهر و مش كانت قايلة ليا !!
طب انا كنت معاها طول ما هي بتجهز نفسها و مش كنت بتاخر عليها في حاجة !!! وانا اكون اخر من يعلم ان بنتي تزوجت و كمان بتقول لشخص تاني علي انه ابوها و انا بتقولي يا عمو !!
دلوقتي انا مقهور منها و تعبت نفسيا من اللي بتعمله فيا طول السنين اللي فاتت و كنت بقول انها صغيرة و مش عارفة حاجة ، لكن من رسالتها اللي بتقولي فيها مفيش مبروك اتضحلي ان البنت عاوزة تحط نفسيا ، انا خلاص مبقتش معتبرها بنتي
و عاوز اكتب كل ما املاكي لاولاد اخويا هم اللي دول اللي ربتهم و هم اللي بيحترموني و اللي بيقدروني ، مش عارف دا تصرف صحيح و لا لا و حاسس اني مشتت و مهموم و مش عارف اتصرف ازاي
