ثقافه وفكر حر

من مختارات التربوي المتقاعد عوني عارف ظاهر نص انصيص.

..
كان يا ما كان في قديم الزمان في هالزلمه متزوج نسوان ثنتين وما بحبلنش راح على هالشيخ وشكا أله حاله ، قال أله الشيخ روح على هذاك الجبل في غول هو بحل ألك مشكلتك ، لما وصل قال الزلمه السلام عليكم رد الغول ،لولا سلامك سبق كلامك لخليت أخوي الي في هذاك الجبل يسمع قرط عظامك شو الي جابك ، شكى الرجل حاله للغول قام الغول وداه عند اخوه الي على الجبل الثاني ،وراح عند اخوه وصار معاه نفس الشئ واخوه وداه عند اخته الغوله الي على جبل ثالث وفي الأخير اخته بتوديه على بستان رمان وبتقول اله بتروح على البستان وبتلاقي غول نايم بحرس البستان بتعبر وبتقطع حبتين رمان
راح الزلمه على البستان ولقي الغول نايم وذنيه ذان فراش والثانيه غطا ، قطع الرمانتين وهو في الطريق شفت نفسه واكل نص رمانه روح واطعم زوجته الغريبه رمانه واطعم بنت عمه نص الرمانه ، قمن حبلن الاثنتين الغريبه جابت توم اولاد وسمتهم الحسن والحسين وبنت عمه الي اكلت نص الرمانه جابت نص بني ادم وسموه نص انصيص ٠ وكبروا الاولاد وصاروا يسرحوا على الصيد مع بعض الحسن والحسين معهم خراطيش وبواريد صيد ويركبوا على الخيل ونص انصيص يركب سهلة عرجه ومعاه مقليعه ومقحار ، الحسن والحسين ما يصيدوا شئ ونص انصيص يصيد ارانب وغزلان وغريريات ونياص ، اخوته يطعموه قتله ويوخذوا صيده منه ويشوهن ويوكلوهن ويرموا العظام باب بيت امه ، امه تتظايق ويقول الها نص انصيص ياما انا بصيد جميع هالصيد وهم بظربوني وبوخذوا الصيد مني ، ما حدا بقى يصدق نص انصيص ، أجى ابوه اتخفى ولحقهم على الصيد وشاف الصحيح كيف انهم الحسن والحسين بظربوا نص انصيص وبوخذوا صيدته ، بعد ما انكشفوا اخوته انهم بوخذوا صيد نص انصيص راحوا يصيدوا في بلد بعيده ، بس أوجه ا على البلد ألا الغوله بطحطح ورا ديك بس شافتهم ، هلا في اولاد أخوي قالت الهم ،هذا الديك بدي أذبحه وأطبخ الكم عليه مفتول ، طبخت المفتول وعشتهم ونيمتهم ولما اجت على نص انصيص قالت إله وين بدك تنام ، قال نص انصيص أنا بنام في القرطله الي معلقه في السقف ، واخذ معاه قربة ميه وخزقها وعلقها فوق راسه عشان تظل تنقط عليهواخذ أخرى لهوة فول في أيده عشان يقرط وما ينام ، في الليل سمع الغوله بتقول امظين يا سناني امظين توكل نص انصيص واخوته الاثنين ، قام نص انصيص قرط حبة فول قالت اله الغوله، شو مالك قال جعان راحت ذبحت أله دجاجه وصارت تطبخ أله فيها لما طلع النهار ، ثاني ليله نفس الشي ، أمظين يا اسناني٠٠٠ قام قرط نص انصيص حبة فول قالت اله شو مالك قال الها جوعان أجت ذبحت أله جوز زغاليل وصارت تطبخ فيهن لما طلعت الشمس ، سرحت الغوله تقظي اغراظها نص انصيص قال لاخوته في غيابها هذه غوليه مش عمتنا وبتربرب فينا عشان توكلنا ، أخوته ما صدقوه وقالوا هذه عمتنا ولما تيجي رايحين نقول ألها، ركب نص انصيص شاته العرجه وشرد أخوته الحسن والحسين لما شافوه شرد أجوا لحقوه ، لما رجعت الغوله وما لقت ولا حده في الدار صارت تمدح وتقول ، ياحيانة خبزي وزيتي رحن ربايب بيتي ٠٠ يا حيانة خبزي وزيتي رحن ربايب بيتي ، وقفت وصارت تدعي وتقول ياريت النخاله الي اكلتهن شاتم يا نص انصيص تعقد في ركب شاتك والشعير الي اكلنهن خيل الحسن والحسين تعقد في ركبهن ووقفن ، نص نصيص قال طيري يا نخاله اما خيل اخوته عقدت في ركبهن ووقفن ، اجا نص انصيص ركب اخوته على شاته العرجه وطار فيهم لأن الشعير عقد في خيل اخوته ووقفن مطرحهن ولحقت فيهن الغولة واكلتهن ، لما وصلوا بلدهم قال نص انصيص بدي اجيب الغوله هان قالوا اله اخوته ما بتقدر قال الهم انا نص انصيص ٠٠ حمل هالجحش حلاوه وراح عند بلد الغوله ، هي الحلاوه هي الحلاوه ينادي نص انصيص ، طلعت الغوله معها ليره ذهب بدها تشتري قال الها نص انصيص اطلعي كلي قد ما بدك لما طلعت على الجحش وصارت جوه صندوق الحلاوه بتوكل سكر عليها نص انصيص، وصارت تصيح افتح الي ولا بوكلك قال الها انا الي بدي اريح الناس من شرك ، صارت تترجى فيه افتح لي وبعطيك الذهب الي مدفون في المطرح الفلاني ، افتح وبعطيك ٠٠وهوتي ماشي فيها عالحمار جوى الصندوق لما وصل بلدهم وقال لإهله سخنوا الي ميه ولما غلت الميه دارها عليها لما ماتت ٠٠
حقيقية نص انصيص كبر فينا وكبر حتى صار له قرون وظلينا احنا إسخول…..مش ملحقين حتى النخالة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

15 − 10 =

إغلاق