قصيدتان لسلطان العامية محمد البيطار وشاعر الأمة محمد ثابت بديوان فرسان العامية

قصيدتان لسلطان العامية محمد البيطار وشاعر الأمة محمد ثابت بديوان فرسان العامية

—-

قصيدة عدسة مكسورة لسلطان العامية المصرية محمد البيطار

—-

كل الفراغ زحمة

كل الزحام فاضي

كل القدر رحمة

كل اللي راح عادي.

 

انا كنت جثة بتحضن الاسفلت

حواليا زحمة وصوت صريخ

مذهول

بيقول:يا ناس اتصلوا بالإسعاف

و واحد جاي يحس النبض فـ وريدي

وواحد تاني لف وخاف

وانا متبت فـ ورقة متبتة ف ايدي

وسامع كل صوت ما طلعش

ما بين واحد بيهمس باندهاش

ودموع:ده متعور!

وواحد رافع التليفون وبيصور

وواحد كان بيحلف ان انا سكران

وواحد قال ماهوش غلطان

وواحدة بتشتري الجرنان

عشان اتدارى م المشهد

انا مقرر اكون مالي فراغ الكادر

لاني جاي هنا اصلا

وحاطط جوة شنطة ضهري

عدساتي وكاميرا وفيلم

واستاندى اللي بيعيط

و ورقة عليها كام تليفون

وعنوان كنت جاي له عشان

اصور حد كان فرحان

لكن ما لحقتش الصورة

لاني الان

انا والكاميرا والأفلام

وآهة عدسة مكسورة

وبعد مرارة المشاوير

ولغز الزحمة يرسمني

وبيسيبني بدون تفاسير

انا دلوقتي بس ركنت

وسايب روحي جنب الناس

وجنب الضل من جثة

عليها وش كان شبهي

وحاضن لسعة الاسفلت.

#محــــAlbitarــــمد

 

—–

شَهِيد الحُبّ /قصيدة لشاعر الأمة محمد ثابت

—————-

مَبَقِتش أقول الكلام

عن قلب بات موجوع

ولا عن تخلف غبي

في الجهل بات منقوع

أنا فوق حدود الفَضَا

خارج مِعَدِّيكِي

ولو ان روحي خلاص

مبقتش في إديكي

عايز لجسمي أعود

وعنيا تفديكي

لكن خلاص اللي فات

مبقاش بإمكاني

واللي مَضَى مَضْمَضَة

تَفِّتْ عَلى الجاني

طَهَّرْت جرح قديم

والجرح عاد تاني

والْهُوجة قامت ونامت

بِلُوكاندة الدراويش

والحق من غير ديابة

تنهشه الحرافيش

والحلوة تبكي ما تبكي

بالحنة حنوها

إيه راح يفيد البكا

والزفة زفوها

يلعن أبوه اللي خان

والخاينة يلعن أبوها

يلعن أبوه اللي خان

والخاينة يلعن أبوها

———

قصيدة لشاعر الأمة محمد ثابت

مؤسس شعبة شعر الفصحى باتحاد كتاب مصر

مؤسس نوادي الأدب بإقليم شمال الصعيد الثقافي