عين الله عليكم يا اعز الناس
يحبابي وعزوتي وأهلي والاصحاب
تباريكم من اچفوف الغدر والجور
وتحوّطكم ابسور الماتعبره ذياب
بعيده ادروبي عنكم والاخبار اجنون
وروحي وگلبي يمكم وانه بين اغراب
تجيني اعلومكم عز خنگتي امن الشوگ
وتتخالف اهمومي اسراب تغزي اسراب
مره بصوتكم افرح يطالب گام
ومره احزن على المنكم غدر ينصاب
ايد الله معاكم يالهممكم سيل
لوهد من جبل يجرف ظلام الغاب
مدوا اچفوفكم بالنجم لاترضون
شموس احوو لسماكم لو گمركم غاب
و هموا اجدامكم لاحت بشاير خير
گصيره دروبكم والفرحه ع الابواب
گربت والحلم واقع گريب يصير
وتگر اعيونكم ويرد شباب الشاب
گصايب بالخبز انباعن وايوب
قد مسني الضرر نادى بگلب مرتاب
واتعده الصبر كل الحدود وزاد
واتجمّعن كلهن للفرج لسباب
عراق الماتبلعه ومن تعضه الحوت
يصير اهلال ، ويرد گمره بحله اثياب
ويرد شيخ المضيفه الفارگاه ادهور
ويرد يلبس اعگاله ومايلف انگاب
ويدگ بهاونه وهيله يفوح طروش
تلم شمل العشيره وتجمع الاحباب
ياضخر العراق ويا امل وزماط
گضيناهه ابضنك نتنفس العطاب
نريد اصواتكم تغسل اذان الكون
ونسايم من شمال انريدكم واطياب
طيحوا اعلى الصبخ زخة زلال وديم
وخل يبزل ملحهه ويثمر الچبچاب
ويرد سرب الفخاتي الفارگ النخلات
ونرد (طاح الرطب ) نسمع يغني بآب
موروث شعبي :
(ياقوقتي يابنتي
طاح الرطب ماضگتي
ياقوقتي طاح الرطب
مَن ياكله ؟ شيخ العرب)
