اكثر اشي بحبوا بعد ما ينتهي العرس ع الساعه ١٢ بالليل وبروح العريس ع بيتو او ع بيت اهلوا بستريح شوي ومن الساعه وحده ليلا لحد أذان الصبح،،، والمجموعة تعد بالنقوط ،، واحد بفتح المكتوب واحد حامل دفتر وبكتب الاسامي والثالث بوخذ المكتوب الفاضي وبعصروا عشان يكون متأكد انو اللي بطول المصاري من المكتوب ما نسي مئه شيكل بزاويه المكتوب ، واربعه مُتفرجين ،، بتيجي ع اسم ابن خال العريس وواحد من المتفرجين بقول:
اكيد الف بفتحوا المكتوب والنقوط
٦٥٠ شيكل ،، وع الوجوه كآبه وواحد بقول تنسوش انو بعلم ٣ بالجامعه
مكتوب ثاني باسم حرم مصطفى محمد المسعود ،، ًوبنقعد خمس دقايق نتحزر
مين هاي حرم مصطفى ،، لقينا مكتوب بدون اسم عليه من بره وبداخله ١٠٠٠ شيكل ،، كمان عشر دقيق بضيعوا عشان نعرف مين اللي حُط نقوط بدون ما يكتب اسمو ،،، العريس نعسان بس بدو يظل ويعرف بعد ما يرجعوا كل الديون الباقي وين بدو يروح ،، ع جزدان آمو او يعطوه قرشين عشان يسافر ع اسطنبول شهر (اسبوع) بصل متأسفه عسل لقينا مكتوب فاضي مع اسم ،، مش معقول يعملها ابو بشار اكيد نسي يحط المصاري
وابو سليم نقوطه ٢٠٠ شيكل واخت العريس من بعيد مش عيب عليه اجو عشره ع العرس وتعشوا آكلو فواكه وكنافه ع ٢٠٠ شيكل عنجد الناس بطلت تستحي ، وحرم محمد سلامه نقطت ١٠٠ شيكل بس اخت العريس نطت وقالت قبل ما حدا يعلق : بس تنسوش انها جابت عشر كراتين كولا ،،
قررت ع عرس ابني باسل اعزم ١٠٠ واحد فقط لا غير ،، ناويه بعد العرس انام والصباح رباح
