صباح الخير والخيرات .
بتعرفوا يا جماعة الخير اكتشفت انه اذا بدنا نصون صيامنا .لازم ما نطلعش من باب الدار وبره ؟
ومش بس هيك .لا نتصل بحدا ولا نرد على التلفونات .
ألله يقطعه هاللسان شو دايما معثرنا !!!
بالكم مش سهل الانضباط الزائد .
هو بالاصل برمضان وبغير رمضان لازم نصون لساناتنا .بس طبعا برمضان أكثر .
بتعرفوا ؟؟؟
على ما يبدو انها الناس مثل هالبالونه المنفوخه .وما بصدقوا على حدا ينغزهم .عشان يفقعوا ويتفرقعوا .
هالشباب طايرين طير بهالشوارع
الناس اللي محوربه بعضها بدهاش تصطلح
المره وجوزها بتزيد مناقرتهم ومشاكلهم
حتى اللي بواصلوا الولايا .زي حمل وبدهم ينزلوه عن ظهورهم .
لليش يعني ؟؟؟ كل هالحياه زقر بنقر .وما حدا طايق حدا .والكل بصيح من المصروف .لا حدا شاعر بفقرا ولا بمساكين .ولا حدا متعود عالصبر .كله بده يطخ كله .وزي ما قلنها الختياريات :
” المسأله واقفه على قنقيزه ”
ضغوطات الحياه ومنغصاتها كثيره .الوضع المادي عند معظم الناس ميكل هوا .الالتزامات صارت تزيد عن حدها .وخلصوا الناس من نقوط العرسان لحد قبل رمضان بيوم .وصاروا هاملين الهم للاعراس يلي بعد رمضان .
شو هالعيشه ؟بطلت تنطاق .!!!
فعلا انه” القابض على دينه كالقابض على جمره “
