الفنانة : زينات صدقي
في يوم حلمت في منامها ان ف بيتها مصاحف من الحجم الكبير والصبح راحت اشترت نفس المصاحف من حي الازهر وكانوا ضيوفها بتعجبهم المصاحف فبيطلبوها منها فبتديهالهم ومفضلش منها غير مصحف صغير تقرأ فيه وبعد كل قراءة تكتب ورقة صغيرة فيها رسالة لربنا زي “يارب افتحها في وشي..يارب هات لي شغل” يارب ارجع تاني اشتغل واسدد ديوني”
وكان من بين الرسايل دي يارب تكرم ولاد اختي نادرة وتهدي لها عيالها طارق وعزة يارب تحنن على قلب صاحب البيت وتخليه يصبر عليا ف دفع الايجار المتأخر..يارب ساعدني ووفقني واكرمني ف صحتي وابعتلي شغل”
قعدت زينات صدقي 16 سنة في بيتها من غير شغل مظهرتش الا ف “السراب” و”بنت اسمها محمود” 1975 وده اعلى فيلم اخدت فيه فلوس 500جنيه وبدون اجر مجاملة للمنتجة لولا صدقي ظهرت فيلم “خطيب ماما”.
واول م الحال يضيق بيها تروح تشتغل في مسارح الشركات والجامعات.
ورغم ظروف الحال الصعبة كانت في العيد الناس كلها بتشتري لحمة وزينات صدقي في بيتها بتاكل بدنجان فكانت تاكل راضية ومبسوطة وتجري ع الاوضه تجيب الصاجات وتغني: راح المال وراس المال وقرايبها يرددوا وراها: وهما مبسوطين
بنت اختها بتقول “في حوار مع الاستاذ ايمن الحكيم”: كنت ديما اشوفها بتهزر وتضحك وعمرها م بكت قدامنا مع اني كنت عارفه انها بتبكي وتدخل اوضتها وتقفل على نفسها وتقعد تعيط على حالها من غير م حد ياخد باله.
بتقول في مره قولتلها: ياطنط م تروحي نقابة الممثلين ولا مبني التلفزيون وتوريهم وشك عشان يفتكروكي ويشغلوكي فكانت تزعل اوي وتقولي: انتى ترضيلي اهين نفسي في العمر ده والمكانة دي اسم زينات صدقي دا انا عملته بدمي واعصابي وعمري ولا يمكن افرط فيه..انا مش ندمانة ولا زعلانة أني عيطت ..الفن كل حاجه وما أخدتش منه حاجه..الناس عارفه تليفوني وعنواني واللي عاوزني يطلبني إنما انا عمري ما أنزل اتسول دور ولا اقولهم انا اهو
في مره عبد السلام النابلسي بيقولها بهزار: يا زينات مش معقول كلنا ارتقينا ورحنا الزمالك وجاردن سيتي ومصرالجديدة وانتى لسه قاعدة ف عماد الدين لازم تشوفي شقة تليق باسمك فردت عليه : واجيب منين عشرين جنيه كل شهر إيجار شقة في الزمالك؟ خليني في عماد الدين على قدي..اهي عيشة والسلام.
كانت بتعمل الأكل بايديها وفي مره في فيلم شارع الحب كانت حاطه عمود الاكل قدامها وعدي عليها عبد الحليم حافظ نادتله: اقعد ياحليم كل معايا دا اكل مسلوق خفيف ع المعده فقالها: ياماما زينات ياريت كنت اقدر انا اكلي اهو وطلع من جيبه علبة دوا فعيطت ونزل عبد الحليم يبوس راسها ويواسيها يعني واصرت انها مش هتحط لقمة في بقها
زينات صدقي كانت بتعطف على كومبارس اسمه ابراهيم فوزي وفي مره كان واقف ع المسرح ووقع ع الارض ونقلوه المستشفى ومات.. تكفلت هي بمصاريف جنازته وكلمت ناس كتير عشان يحضروا جنازته وكل م تعدي الجنازة على قهوة تروح للناس اللى قاعده : الميت ده غلبان ينوبكم ثواب تعالوا امشوا وراه.. وراحت المسرح بعدها ودبت خناقة مع بديع خيري وسراج منير وعباس فارس لانهم تكاسلوا عن تشييع الجنازة وقالتلهم: يعني ده لو كان يوسف وهبي ولا محمد عبد الوهاب مش كان زمانكم بتجروا ع الجنازة عشان تطلعوا في الصور..
يمر الزمن وتموت الست زينات ومحدش يمشى في جنازتها غير اهلها ..ومفيش ولا فنان راح جنازتها
الله يرحمها فنانه مش هتتعوض
