لوحة شعرية تميزت بروعة التصوير وقوة التعبير رسمها شعرا وجسدها مشاعرا وطوع مفرداتها بتمكن وتميز الزميل الشاعر القدير سعد بن زمانان – معد ومقدم برنامج ديوانية الشعراء بتلفزيون الكويت- وأهداها -مشكورا- بمناسبة إلى أعضاء (نخبة الشموخ :
ماهي سوا هالناس والعرف ينبيك
والفرق واضح من قراح وهماجه
أحدٍ يجي لك من معزه ويغليك
وأحدٍ يجي لك لا بغا منك حاجه
وأحدٍ بدون أسباب ماهو يدانيك
وإليا يذكروك بنعِم زاد إنزعاجه
وأحد يتنومس كل ماحل طاريك
وإليا إمدحوك يزيد فيه إبتهاجه
عليك باللي في زمانك مصافيك
علم الوفيّه بالحياة إنتهاجه
وإليا نصيته فز عجلٍ يحييك
يزيد بالترحيب يضحك حجاجه
اللي يجازي بالحساني حسانيك
يضوي على درب المعالي إسراجه
وإترك كذوبٍ مايسرّك ويذّيك
يضحك وقلبه أسوّدٍ لون صاجه
أحدٍ سوات الغيث شوفه يهنيك
وأحدٍ يعومس خاطرك كالعجاجه
ولا تستشير إلاّ نبيهٍ يقدّيك
رايه سداد ولا يعرف العواجه
وجالس إرجالٍ هرجهم دوم يشفيك
أخير وأبرك من هروج السماجه
ولا تجامل اللي مايوّدك وجافيك
أبعد وخله ذا دواه وعلاجه
والله عن اللي ينقل الكبر يغنيك
جنّب مزاجك لا يوالم مزاجه
*سعد بن زمانان*
