بئر ” السرو ” المسحورة في الصحراء الغربية بقلم الكاتب ناجي أبو شنب

بئر ” السرو ” المسحورة في الصحراء الغربية

✍️🌹🌲💐✍️🌹🌲💐✍️🌹🌲💐✍️

فيه مكان غريب جدًا في مصر وتحديدًا في الصحراء الغربية عند واحة الفرافرة.. فيه واحدة من أعجب عيون المياه الجوفية في العالم كله.. عين اسمها عين السرو وحكايتها فعلًا تحيّر أي حد يسمع عنها.

العين دي مش شبه أي عين مياه جوفية تانية معروفة وبيحصل فيها ظاهرة غريبة جدًا لدرجة إن ناس كتير قالوا عنها إنها مسحورة لأن مفيش تفسير واضح ليها لحد دلوقتي.

الغريب في عين السرو إنها بتكون فاضية تمامًا ومفيهاش أي مياه خالص لكن أول ما أي كائن حي يقرب منها سواء إنسان أو حيوان أو طائر تبدأ العين فجأة تمتلئ بالمياه وكأنها استجابت لوجوده. والأعجب إن بمجرد ما الكائن ده يبعد أو يمشي الميه تختفي تاني وترجع العين فاضية زي ما كانت.

المشهد ده يخليك تحس كأن العين واعية باللي حواليها وكأنها بتقدم الميه كنوع من الضيافة ولما الضيف يمشي تسحبها تاني. وده شيء بيتعارض تمامًا مع طبيعة عيون المياه الجوفية المعروفة لأن أي بئر مياه جوفية بيفضل يطلع مياه باستمرار على مدار عمره لحد ما ينضب. لكن عين السرو وعلى مدار تاريخ طويل عمرها ما نشفت وبتفضل تقدم الميه لأي كائن يقرّب منها وبعدين ترجع تختفي بعد رحيله… سبحان الله.

العين دي كانت جفت من كام سنة بسبب الإهمال بعد ما انسدت واتملت بالأعشاب والرمال لكن بعد ما اتنضفت رجعت لحالتها الطبيعية الغريبة زي ما كانت قبل كده.

العلماء حاولوا يلاقوا تفسير علمي للظاهرة دي وقالوا إن ممكن تكون الأرض اللي حوالين العين رخوة وضعيفة وشبه الإسفنج وأول ما أي وزن يضغط عليها تبدأ تضخ المياه المخزنة تحتها من خلال قنوات طبيعية تحت التربة فتظهر الميه في العين.

لكن التفسير ده قابل اعتراض كبير لأن ممكن يكون منطقي مع الإنسان أو الحيوانات التقيلة، لكن إزاي نفس التأثير يحصل مع طيور خفيفة أو حتى حشرات وزنها شبه معدوم؟ وده اللي خلا لغز عين السرو لحد النهارده مفتوح ومحيّر

بقلم الكاتب ناجي أبو شنب

—_—————

عناية مكتب القاهرة مدير التحرير ومدير مكتب القاهرة شاعر الأمة محمد ثابت