قصيدتان لشاعر الأمة محمد ثابت ود محمد رزق في ديوان فرسان العامية

قصيدتان لشاعر الأمة محمد ثابت ود محمد رزق في ديوان فرسان العامية
——

تعالوا ياناس …!
شعر د محمد رزق
*****
تعالوا نقول كلام فاضي
ونشكي الحب للقاضي
ونلغي البسمة لو بانت في وش حبيب
تعالوا نغيب
ونتخاصم ونفتح صفحة المجاريح
بغـدر صريح
وغش صريح
وكِـدب صريح
ونتنازل عن اللقمة اللي كلناها مع الأصحاب
تعالوا نقَـفِّـل الأبواب ،
نسد الحيطة لو نسمع نِدا م الجار
تعالوا نِفـتِـش الأسرار
ونعلِنها علي الرايح وعَ الغادي
تعالوا نبيع هوا بلادي ،
ونزرع كُره في الوادي
ونشطب مجد أجدادي ،
تعالوا نموت ويحيا الظالم العادي
عشان نرتاح
من التوهة اللي جوَّانا ، وم الإحساس
ومن كل المعاني البور ،
وم الضلمة اللي تمحي النور
من الدنيا اللي عشناها زمان بالحب وقلوبنا
بترقص من هنا وسرور ، ومن لَـمِّة حبايبنا
مع القمرة في ليل وَنَّاس
تعالوا نسيبنا م الماضي ، ونشكي الحب للقاضي
تعــــالوا يا نـاس …!
*******

——–

شَهِيد الحُبّ /قصيدة لشاعر الأمة محمد ثابت

—————-

مَبَقِتش أقول الكلام

عن قلب بات موجوع

ولا عن تخلف غبي

في الجهل بات منقوع

أنا فوق حدود الفَضَا

خارج مِعَدِّيكِي

ولو ان روحي خلاص

مبقتش في إديكي

عايز لجسمي أعود

وعنيا تفديكي

لكن خلاص اللي فات

مبقاش بإمكاني

واللي مَضَى مَضْمَضَة

تَفِّتْ عَلى الجاني

طَهَّرْت جرح قديم

والجرح عاد تاني

والْهُوجة قامت ونامت

بِلُوكاندة الدراويش

والحق من غير ديابة

تنهشه الحرافيش

والحلوة تبكي ما تبكي

بالحنة حنوها

إيه راح يفيد البكا

والزفة زفوها

يلعن أبوه اللي خان

والخاينة يلعن أبوها

يلعن أبوه اللي خان

والخاينة يلعن أبوها

———

قصيدة لشاعر الأمة محمد ثابت

مؤسس شعبة شعر الفصحى باتحاد كتاب مصر

——-

ديوان فرسان العامية

من سلسلة ملتقى الشعراء

كتاب دوري يصدر كل ثلاث شهور

رئيس التحرير

شاعر الأمة محمد ثابت

مستشار التحرير

د فاطمة أبو واصل إغبارية

مدير التحرير

شاعرة النجوم إلهام عفيفي