قصيدتان لأيمن عبد المقصود وشاعر الأمة محمد ثابت بديوان فرسان العامية
لازم
…….
هي كلمة أخيرة لازم
والكلام دا لابد مِنُّه
اللي كان للقلب لازم
قلبي فاق و استغنَه عَنُّه
والكلام واضح وجازم
قلبي يحلفلِك بإنُّه
خَط فيكي كتير ملازم
والكلام واضح لَكِنُّه
قلبي راح مِنِّك خلاص
و اكتفَىٰ بدون التباس
حُب هَش مالوش أساس
إلا صِدق النيّة عَندي
قلبي كان طَيِّب بـ يِدِّي
بس دَخَّلْتِيه تَحَدِّي
و افتريتي عليه و ياما
سيبتي فيه مليون علامة
كنت اعاتبك والملامة
كلمة من بين السطور
مش ح الِف كتير و ادُوُر
بس بانتلي الأمور
إنتي لعنة جميلة خالص
عَتْمَة حلوة انا بيها حاسس
بس شيء جوَّاكي ناقص
إن قلبَك زي آلة
و الهوا عندِك كِمَالَة
إنت إمشي ، رُوُح ، تعالَه
إشتغالة في اشتغالة
قلب ديجيتال بالحجارة
فهلوي و الناس سَكَارَىٰ
قلبي مش ورشة نجارة
تكسريه و انا فيه اصَلَّح
قلبي طيب ، ياللا إجْرَح
قلبي صَدَّا ، قلبي مَلَّح
و اترميت في الليل عليل
وزني راح وبقيت هزيل
بس أبداً مش عويل
لِسَّه ساكن فِيَّا مارد
قلبي كُوُن وجناحُه مَادِد
فوق سحاب العِزَّة فَارِد
ما انكسرشي و انتي عارفَه
لِسَّه قادر و انتي شايفَه
بس برضو في قلبي رأفَه
مش ح اجَرَّح فيكي أَصـْلي
إبن ناس و اعمل بأصلي
كنت أعمَىٰ ، كان ناقصلي
إني اشوفِك ع الحقيقة
للوضوح مليون طريقة
طِلْعِت الشمس البريئة
وَضَّحتلي كل غامض
العسل كان مُر ، حامض
قلبي لِسَّه شديد و صامد
و انتي ماشْيَه زي ذكرَىٰ
إنتهت مش جايَه بُكْرَه
فِكْرَه تمشي بتيجي فِكْرَه
قلبي فاق جِدَّاً ، خلاص
قلبي مُخْلِص و ابن ناس
مش ح اكونلِك ع المقاس
إطلعي من قلبي يالَّلا
شمس بُكْرَه فـ قلبي طَلَّه
ح املا عمري زهور و ضِلَّه
و انتظر ، و الدنيا جَايَّه
فيه قلوب لِسَّاها حَيَّه
اللي شوفْتــُه مش شِوَيَّه
وَعـْـد، ح امسح دمع عيني
قبل ما تسرسب سنيني
رَبِّي طَيِّب ح يراضيني
بقلب يملا الكون عَلَيَّا …
… أيمن عبد المقصود
——-
شَهِيد الحُبّ /قصيدة لشاعر الأمة محمد ثابت
—————-
مَبَقِتش أقول الكلام
عن قلب بات موجوع
ولا عن تخلف غبي
في الجهل بات منقوع
أنا فوق حدود الفَضَا
خارج مِعَدِّيكِي
ولو ان روحي خلاص
مبقتش في إديكي
عايز لجسمي أعود
وعنيا تفديكي
لكن خلاص اللي فات
مبقاش بإمكاني
واللي مَضَى مَضْمَضَة
تَفِّتْ عَلى الجاني
طَهَّرْت جرح قديم
والجرح عاد تاني
والْهُوجة قامت ونامت
بِلُوكاندة الدراويش
والحق من غير ديابة
تنهشه الحرافيش
والحلوة تبكي ما تبكي
بالحنة حنوها
إيه راح يفيد البكا
والزفة زفوها
يلعن أبوه اللي خان
والخاينة يلعن أبوها
يلعن أبوه اللي خان
والخاينة يلعن أبوها
