ها اكتب لك والعمدة المعني
تعرفني باطير ف الأسطورة
عصفورة بريش منحوت بالريشة
السماوية
يشبهني البرق وصوت الرعد
ورموز ملكين
ف حدائق بابل
وها اكنِّي بنخلة وفلَّاية
وسحابة بتجري ورا سحابة
ومروج وعروج
وبروج بتفسَّر مين
ولفين
عنواني جنين بتخلَّق جوا قصيدة
ومجموع الأجزاء
لو تقسِم يطلع لك روحي
إضربها ف روحك
هاتبان الحسبة ازاي العشق
وان السهم الراشق
بيصحِّي احلام كات نامت
مش كل المستور بيبان
م العنوان
ولا كل غرور الحب
جنان
إجتَر المكنون ف ضلوعك
وقلوعك عرَّفها الموج والبحر
عرَّفها تفك السحر
وان مفيش ف الجر
إلا حروف الجر
وان العوم لو كان مدروس
مسيرُه البر
عنواني هلال راح يكبر
جوا الحرف
زي الكلمة الممنوعة الصرف
وصلة الموصول
بالنظرة وهمهمة القلب
وصول
دا العمر فصول
واللؤلؤ
في عمق الأعماق
للي بيقدر يتحكِّم ف انفاسُه
ويدُق الأجراس
ما يسِد عيون الشمس
الخناس
الشاعر وحيد راغب
