
بدي أحكي قصة صارت معي ، حكى معي شب وطلب يتعرف لهدف إرتباط وانو مش جاي يتسلى ومن هالأمور ، الإشي بصراحة كان جدا حلو ، كان مرتب ، انيق ، كريم ، سيارة جديدة ، وما كان مبين شي غريب او مش واضح… حكى انو تعلم هندسة بالتخنيون، وانو معه جواز أمريكي ، وبلش مشروع في دبي وكان يفرجيني صور. مع انو هاي الشغلات كلها ما بتهمني لأني كل عمري أسافر وعندي شغل ودخل منيح وسيارة جديدة ، ما بهتم بالشكليات قد ما بهمني مستوى الوعي والثقافة والأخلاق. لدرجة اني بشي مرحلة صرت انزعج من قصص امريكا ودبي. مرة اقترحت عليه نروح عالبلد ناكل حمص فول وكان رافض الفكرة تماما .
المهم بعد فترة التقيت بأمه وأخته وشوي شوي بلشت أكتشف حقائق غريبة ، مع اني حسيت بعمل غلط بس بلشت افحص وأسأل عنه ناس من حواليه ، بقولولي هو ذكي وشاطر بس ولا مرة فات يتعلم وكمل أكثر من شهر ، كان بده يتعلم هندسة ، نقل بين عدة كليات وما كملش ولا بمحل ، فش جواز أمريكي بالقصة ، كان مقدم على فيزا للتعليم في امريكا وارتفض اول مرة ، وحاليا رجع يقدم من جديد ، المشروع بدبي كانوا حاكيين معه اولاد عمه يفوت معهن شريك بعيسك تأجير سيارات ومفكر يدخل فيه . انا ما بدي احاسب او أحكم على ظروف البني آدم ، بس بعتبر اني بتعامل مع شخص بيكذب وبخبي ، وشغلة مجرد فكر فيها صارت بالنسبة اله مشروع قائم ، مش فاهمة كيف شخص عنده كل هالجرأة والثقة يحكي هيك ، مش قادرة اواجهه لأني يمكن اضربه او ابهدله. سألت صديقة قالت لي فترة التعارف والخطوبة إسمها فترة الكذب وبيع الأحلام ، بعرف هذا الإشي ، بس مش لهالدرجة ! وأصلا لو حكى الحقيقة كنت رح اتعامل عادي مع الموضوع ، الماديات والشكليات ما بتهمني ، بالعكس كنت رح اساعده وأدعمه. صرت أشك بكل شي ، يمكن يطلع كان متجوز ومخلف ولد.
كثير صعب علي فكرة الكذب
المصدر : صبايا الخير