فراشه
شُفّتكْ طِلوعْ الشَّمسْ أَوَّل شَهِرْ نيسانْ— مِثلْ الفَراشِه الْ ما بَين الزَهر المّنَدّي
تْطيري بِمرِج الصِّبَا وتنفِّضي الجِنْحَانْ—وإنتي بِسِحِرْ الغِوى وْبِالروحْ معتدّي
مَرّه تُغطّي بْهنا، توَعّي زَهرْ غَفْيانْ——ومَرّه صلاة الفَجِر، بِخشوعِك تأَدي
بلّشت أُركض وَرَاكي بْلهفة الصُبيانْ—-وحِلم البراءَه وبِحِضنْ مْروج مِمْتَدّي
بَلكي كَمَشْتك عَ قَصْفة زَهرْ أو رِيحانْ—وصُرتي مَلاكي وعطِر الروح بيندّي
نْهاري قَضَيْتو رَكضْ حتّى صُرت هَلكانْ—طَوّي حِرام ْالوقِتْ مِدّي بَعدْ مِدّي
اسْتَسْلِمتْ مِثل اليَأسْ عَ مخدِّة الحِرمَانْ—و”رُوحي”بِصَوتي صِحِتْ، والصَوتْ بيوَدّي
ومْسكتْ زَهْرِه حَلاكي الْ عِطرْهَا سَكرانْ—شمّيت مِنْهاَ عَبيركْ و تاعَبَقْ خَدّي
ومَطْرَحْ ما طَيْفِكْ مَرَقْ نِمتْ وأنا قلقانْ—ووِعْيتْ عِيون الهَنا وإلّا شُفتْ حَدّي
أجْمَلْ فَراشِه بِمرج العاَطفه الرَّيّانْ —هدِّتْ عَ زَهْرِة حَنَيني بحُبّ ومْودّي
تناغي بعِيون الوْعي وِبْخَاطري الوِجْدانْ—ويقلّي يَ إبني المَرا بالليّن والشدّي
مثلْ الفراشه الجَميله الْ زاهيه الألوانْ—-كُلمَا وَراها رَكَضِتْ بْروح مِحْتدّي
بِتْغيبْ عَنّك غَصِب غَيبة حِلِم هَربانْ—بتِسْقيكْ كاسْ الجَفاَ وجُرعَاتها الحَدّي
لاكِن تْرِكْها وَقْتْ،يا عاشِق الوَلْهانْ—بترجَعْ بِحُبّْ ورِضَى عَ كِتْفَكْ تْهَدّي
